नगर जिल्ह्यात सोळा हजार हेक्‍टरवर ठिबकचा वापर

नगर : कृषी विभागाने केलेल्या आवाहनानुसार जिल्ह्यामध्ये ठिबक सिंचनखालील क्षेत्रात वाढ होत आहे. सध्या सुमारे सोळा हजार हेक्‍टर क्षेत्र ठिबक सिंचनाखाली आहे. २३ हजार १३४ शेतकरी त्याचा वापर करत आहेत. आतापर्यत ठिबक सिंचनापोटी ४२ कोटी रुपयांचे अनुदान दिले असल्याची माहिती कृषी विभागाने दिली.  

सलग पाच वर्षे जिल्ह्याने दुष्काळी स्थिती अनुभवली आहे. दुष्काळाचा शेती आणि शेती उत्पादनावर गंभीर परिणाम झालेला आहे. मात्र अशा काळातदेखील ज्या शेतकऱ्यांनी पिकांसाठी ठिबक सिंचनाचा वापर केला, त्यांना फायदाच झाला. त्यामुळे जिल्ह्यामध्ये भविष्याचा विचार करता जास्तीत जास्त शेतकऱ्यांनी ठिबक सिंचनचा वापर करण्याचे आवाहन केले जात आहे. त्याला शेतकऱ्यांचा प्रतिसादही मिळत आहे. ठिबक सिंचनासाठी शेतकऱ्यांकडून ऑनलाइन अर्ज मागवले जात आहेत. या वर्षी त्यासाठी बऱ्यापैकी निधीही उपलब्ध झालेला आहे. सध्या जिल्ह्यामध्ये २३ हजार १३४ शेतकरी १५ हजार ८४० हेक्‍टर क्षेत्रावर ठिबकचा वापर करत आहेत. त्यात १३ हजार ८५३ हेक्‍टर क्षेत्रावर ठिबक व १९८७ हेक्‍टर क्षेत्रावर स्प्रिंकलरचा वापर होत आहे. त्यासाठी आतापर्यत ४१ कोटी ९१ लाख ३५ हजार रुपयांचे अनुदान शेतकऱ्यांना वाटप केले आहे. शेतकऱ्यांनी ठिबकचा जास्तीत जास्त वापर करावा यासाठी साखर कारखाने, संस्था, कृषी विभागाकडून जागृती केली जात आहे. त्याला शेतकऱ्यांचाही प्रतिसाद मिळत आहे, असे जिल्हा अधीक्षक कृषी अधिकारी पंडित लोणारे यांनी सांगितले.