कापडणे, जि. धुळे : धुळे व शिंदखेडा शेतकरी सहकारी सूतगिरणीच्या सुधारित प्रकल्प अहवालास राज्य शासनाने मान्यता दिली आहे. २५ हजार दोनशे चात्यांच्या या गिरणीसाठी सुमारे ५९ कोटींची गरज असून, त्यासंदर्भातील प्रकल्प किमतीस मंजुरी देण्यात आली. आगामी सहा महिन्यांत काम पूर्ण होऊन ही सूतगिरणी सुरू होणार आहे. यासाठी केंद्र सरकारकडूनही निधी उपलब्ध होणार आहे, अशी माहिती सूतगिरणीच्या अध्यक्षा ज्ञानज्योती भदाणे यांनी दिली आहे.
शेतकरी सहकारी सूतगिरणीचा आठव्या पंचवार्षिक योजनेत अर्थसाहायासाठी समावेश झाला आहे. २५ हजार २०० चात्यांचा हा प्रकल्प असेल. या मंजुरीसंबंधीचे शासन परिपत्रकही प्रसिद्ध झाले आहे. या गिरणीमध्ये शासनाचा एक अधिकारी कायमस्वरूपी व्यवस्थापनावर असेल. या सूतगिरणीमुळे रोजगारनिर्मिती होणार असून, शेतकऱ्यांच्या कापसाला जवळचे मार्केट उपलब्ध होणार आहे. धुळ्यातील कापूस गुजरात व मध्य प्रदेशमध्ये पाठवावा लागतो; पण पुढे गुजरातमधील कापसाची निर्यात यामुळे कमी होईल. सूतगिरणीत प्रक्रियेसाठी रोज तीन ते चार हजार क्विंटल कापसाची खरेदी होईल, असेही सांगण्यात आले.
केंद्रीय संरक्षण राज्यमंत्री सुभाष भामरे, सहकार व वस्त्रोद्योगमंत्री सुभाष देशमुख, रोजगार व पर्यटनमंत्री जयकुमार रावल आदींच्या प्रयत्नांतून या महत्त्वाकांक्षी प्रकल्पास चालना मिळाली. माजी आमदार (कै.) द. वा. पाटील यांच्या काळात या सूतगिरणीचे काम सुरू झाले होते; पण नंतर अनेक अडचणींमुळे प्रकल्प अपूर्ण राहिला; पण आता हा प्रकल्प उभारण्यासंबंधी सकारात्मक चित्र निर्माण झाल्याचे धुळे जिल्हा परिषदेचे माजी अध्यक्ष मनोहर भदाणे व भाजयुमोचे जिल्हाध्यक्ष राम भदाणे यांनी म्हटले आहे.