प्रभात फेरीत आज गुलाबी बोंड अळी नियंत्रणाबाबत जनजागृती !

औरंगाबाद : मराठवाडा मुक्ती संग्राम दिनानिमित्त प्रत्येक शाळेत आज (ता.१७) आयोजित प्रभातफेरीत जिल्ह्यातील सर्व कृषी विक्रेते गुलाबी बोंड अळी नियंत्रणाबाबत जनजागृती करणार आहेत. औरंगाबाद जिल्हा परिषद कृषी विकास अधिकाऱ्यांनी या उपक्रमाचे आयोजन केले आहे.

याबाबत प्रसिद्धीस दिलेल्या पत्रकात जिल्ह्याती सर्व कृषी निविष्ठा विक्रेते यांना सहभागी होण्याचे आवाहन करण्यात आले आहे. पत्रकात म्हटले आहे, की मराठवाडा मुक्ती संग्राम दिनानिमित्त प्रत्येक शाळेत आयोजित होणाऱ्या प्रभातफेरीमधे जिल्ह्यातील सर्व कृषी विक्रेत्यांनी सहभागी होऊन गुलाबी बोंड अळीच्या व्यवस्थापनासाठी निंबोळी अर्काच्या फवारणीचा, डोम कळी नष्ट करण्याचा व कीटकनशकाच्या सुरक्षित हाताळण्यासाठी करावयाच्या उपाययोजनांबाबत गावामध्ये जनजागृती करावी. जिल्ह्यातील बहुतांश बियाणे व कीटकनाशक कंपन्या साधारणतः दीडशे ते दोनशे गावांमध्ये आपले कर्मचारी पाठवीत असून इतर सर्व ही गावांमध्ये ज्या कृषी सेवा केंद्र जे गाव दत्तक दिले आहे, तेथे त्यांनी मुख्याध्यापकांशी संपर्क साधून प्रभात फेरी मध्ये जनजागृती निर्माण करण्याचे कार्य करावे. यासाठी काही घोषणा (स्लोगन) तयार करण्यात आला असून स्लोगन प्रदर्शित करण्यासाठी फलकाचे CDR व PDF फाईल देण्यात आले असून आपणास नजीकच्या केंद्रावरून प्रिंट काढून शाळेमध्ये विद्यार्थ्यांना ते उपलब्ध करून देता येणार आहेत. या प्रभात फेऱ्या मध्ये सहभागी होऊन सोबत दिलेल्या डिझाईन मधील स्लोगन्स विद्यार्थ्यांकडे देऊन त्यांना उद्घोषित करण्यासाठी प्रवृत्त करावे व  प्रभात फेरी समोर बॅनर व सुरक्षा किट घातलेला एक व्यक्ती ठेवावा म्हणजे मोठ्या प्रमाणात गावकऱ्यांमध्ये या सवयी बाबतची माहिती पोहोचेल व आपणास मोठा फरक समाजामध्ये दिसू शकेल, अशी आपेक्षा व्यक्त केली आहे. संबंधित तालुक्यातील गुणनियंत्रण निरीक्षक या मोहिमेचे नियंत्रण करणार आहेत.