पालकमंत्री पाणंद रस्ते योजनेअंतर्गत वाशिममध्ये ४६१ प्रस्ताव

वाशीम  : पालकमंत्री शेत, पाणंद रस्ते योजनेअंतर्गत जिल्ह्यात ४६१ प्रस्ताव दाखल झाले असून, कार्यवाही व नियोजनाच्या दृष्टीने जिल्हास्तरीय समितीच्या सभेत चर्चा करण्यात अाली.

जिल्हाधिकारी लक्ष्मीनारायण मिश्रा यांच्या अध्यक्षतेखाली झालेल्या या सभेला आमदार राजेंद्र पाटणी, जिल्हा परिषदेचे मुख्य कार्यकारी अधिकारी दीपक कुमार मीना, अतिरिक्त मुख्य कार्यकारी अधिकारी संजय कापडणीस, निवासी उपजिल्हाधिकारी शैलेश हिंगे, उपमुख्य कार्यकारी अधिकारी प्रमोद कापडे, जिल्हा नियोजन अधिकारी सुरेंद्र गवळी, सार्वजनिक बांधकाम विभागाचे कार्यकारी अभियंता के. आर. गाडेकर, उपविभागीय अधिकारी राजेश पारनाईक, डॉ. शरद जावळे आदी उपस्थित होते.

प्रत्येक शेतापर्यंत जाण्यासाठी रस्ता तयार करण्याकरिता पालकमंत्री शेत, पाणंद रस्ते योजना राबवली जात अाहे. याकरिता ग्रामपंचायतींकडून प्राप्त झालेल्या प्रस्तावांची छाननी करून उपविभागीय अधिकाऱ्यांच्या अध्यक्षतेखालील तालुकास्तरीय समितीने हे प्रस्ताव मंजुरीसाठी जिल्हास्तरीय समितीकडे पाठविले आहेत.

या प्रस्तावांच्या अनुषंगाने झालेल्या बैठकीत चर्चा करण्यात आली. जिल्ह्यातून आतापर्यंत ४६१ प्रस्ताव जिल्हास्तरीय समितीकडे प्राप्त झाले आहेत. शेत, पाणंद रस्ते हे शेतकऱ्यांच्या दृष्टीने अतिशय महत्त्वाचे आहेत. हे रस्ते झाल्यास पावसाळ्यात शेतकऱ्यांची होणारी गैरसोय थांबेल. त्यामुळे या रस्त्यांच्या कामांसाठी संबंधित विभागांनी मिशन मोडवर काम करण्याची गरज असल्याचे या वेळी आमदार पाटणी म्हणाले.