पिंक बेरी, भुरी, क्रॅकिंग टाळण्यासाठी उपाययोजना

सध्याच्या वाातावरणामध्ये द्राक्ष बागेमध्ये पिंक बेरी, रंगीत द्राक्षामध्ये क्रॅकींगची समस्या दिसू शकते. सांगली विभागामध्ये आर्द्रता असल्याने भुरीचा प्रादुर्भाव वाढू शकतो. या तिन्ही घटकांसाठी योग्य त्या उपाययोजना कराव्यात.

मागील आठवड्यामध्ये दिलेल्या सल्ल्याप्रमाणे सर्व द्राक्ष विभागामध्ये किमान तापमानामध्ये वाढ झाल्याचे दिसून येत आहे. हे वाढलेले तापमान सर्वच ठिकाणी पुन्हा मागील तापमानापेक्षा चार ते पाच अंशाने कमी होण्याची शक्यता आहे. हे कमी तापमान २३ ते २४ तारखेपर्यंत असेच राहील. मात्र, दुपारचे वातावरण निरभ्र व भरपूर सूर्यप्रकाशाचे राहणार आहे. त्यामुळे दुपारचे तापमान ३१-३२ अंश सेल्सिअसपेक्षा अधिक राहण्याची शक्यता आहे. सर्वसाधारपणे या पाच सहा दिवसांत सकाळ आणि दुपारच्या तापमानामध्ये १६ -१७ अंशापेक्षा अधिक फरक राहील. ज्या बागांमध्ये फळांमध्ये पाणी भरण्यास नुकतीच सुरवात झाली आहे, अशा बागांमध्ये पहाटे थंड व दुपारी उबदार वातावरण राहून या दोन्ही तापमानातील फरक अधिक असल्यास पिंक बेरीची लक्षणे दिसण्याची शक्यता असते. या काळात घड पेपरने पूर्ण झाकून घेतल्यास पिंक बेरी येत नसल्याचा शेतकऱ्यांचा अनुभव आहे. म्हणूनच मण्यात पाणी भरण्यास सुरवात झालेल्या बागेमध्ये न चुकता पेपर लावून घ्यावा. सांगली व जवळपासच्या भागामध्ये पुढील दोन ते तीन दिवस वातावरण ढगाळ राहण्याची शक्यता आहे. असे ढगाळ वातावरण असले तरी पाऊस पडण्याची शक्यता कुठेही दिसत नाही. मात्र, वातावरणातील आर्द्रता वाढण्याची शक्यता आहे. पहाटेचे कमी तापमान, ढगाळ वातावरण व वाढलेली आर्द्रता हे वातावण भुरी रोगाच्या वाढीचे संकेत देतात. अशा परिस्थितीमध्ये भुरीचे बिजाणू वेगाने तयार होतात व प्रसारही वेगाने होतो. म्हणून भुरीच्या नियंत्रणासाठी विशेष लक्ष द्यावे.