गारपीटग्रस्त रब्बी पिकांचे व्यवस्थापन

मागील दोन दिवसांपासून मराठवाड्यासह राज्यातील काही जिल्ह्यांमध्ये पाऊस, गारपीट यासोबतच जोराचा वारा यामुळे पिकांचे नुकसान झालेले आहे. अशा परिस्थितीमध्ये गारपीटग्रस्त पिकांचे संभाव्य नुकसान टाळण्यासाठी खालीलप्रमाणे उपाययोजना करावी.

रब्बी ज्वारी जोराचा वारा तसेच गारपिटीमुळे पीक आडवे पडले आहे. ज्वारीची कणसे जमिनीला चिकटून किंवा पाण्यामुळे बुरशीजन्य रोगाचा प्रादुर्भाव होण्याची शक्‍यता असते. पिकामध्ये साचलेले पाणी त्वरित काढून घ्यावे. आडवी पडलेली कणसे त्वरित कापून हवेशीर वाळवावीत. बुरशीजन्य रोगाचा प्रादुर्भाव होऊ नये, यासाठी मॅन्कोझेबची शिफारशीत प्रमाणात फवारणी करावी.   हरभरा   शेतातील साचलेले पाणी काढून द्यावे. जोराचा वारा व गारपीट यामुळे अनेक ठिकाणी फांद्या किंवा संपूर्ण पीक आडवे झाले आहे. आडवी पडलेली झाडे वेचून, गोळा करावीत. काढणीस आलेले पीक त्वरित काढावे.

गहू जोराचा वारा तसेच गारपिटीमुळे अनेक ठिकाणी पीक आडवे पडले आहे. ओंब्या जमिनीला लागून, पाण्यात भिजल्यामुळे जास्त नुकसान होते. साचलेले पाणी शेताबाहेर काढून द्यावे.

फळपिके   फळपिकांमध्ये गारपिटीमुळे अधिक नुकसान झाले आहे. गारपीट व जोराच्या वाऱ्यामुळे तुटलेल्या फांद्या काढून टाकाव्यात. झाडांना इजा झाली असल्यास तुटलेल्या भागामध्ये बुरशीजन्य रोगाचा प्रादुर्भाव होऊ नये म्हणून कॉपर ऑक्‍सिक्‍लोराईड ३ ग्रॅम प्रति लिटर पाणी किंवा १ टक्के बोर्डो मिश्रणाची फवारणी करावी.

संपर्क : डॉ. भगवान आसेवार, ९४२००३७३५९ (मुख्य शास्त्रज्ञ, कोरडवाहू शेती संशोधन केंद्र, वसंतराव नाईक मराठवाडा कृषी विद्यापीठ, परभणी.)