पूर्णधान्य आहाराचा आरोग्यासाठी होतो फायदा

आरोग्यासाठी साध्या धान्यांच्या तुलनेमध्ये पूर्णधान्यांपासूनचे पदार्थ अधिक पोषक असतात. त्यातून उपलब्ध होणारे तंतुमय पदार्थ हे पाचक, सारक असून, अधिक काळ पोट भरल्याची भावना तयार करतात. सध्या वाढत असलेल्या स्थौल्यत्वाच्या समस्येवर मात करण्यासाठी अमेरिकेमध्ये पूर्णधान्यांपासून खाद्य पदार्थांच्या निर्मितीला चालना दिली जात आहे. त्यात पूर्णधान्ययुक्त गहू ब्रेड, ओटमील, बार्ली, मोहरी, हातसडीचा तांदूळ किंवा जंगली तांदूळ यापासूनचे पदार्थ यांचा समावेश आहे.

अमेरिकी कृषी विभागाच्या ह्यूमन न्यूट्रिशन रिसर्च सेंटर ऑन एजिंग, कृषी संशोधन सेवा आणि बोस्टन येथील टफ्टस् विद्यापीठ यांनी एकत्रितपणे पूर्णधान्ययुक्त पदार्थांच्या आहारातील वापरामुळे होणाऱ्या परिणामांचा अभ्यास केला आहे. हे पदार्थ वजन, रक्तातील शर्करा नियंत्रणासाठी मदत करतात. त्यातून प्रति ग्रॅम मिळणारी ऊर्जा महत्त्वाची असते. सामान्यतः आत्यंतिक प्रक्रिया किंवा पॉलिशिंगमध्ये धान्यातील अनेक पोषक घटक नष्ट होतात किंवा भुश्शासोबत फेकून दिले जातात. पूर्ण धान्यामध्ये त्यावरील पोषक आवरण जपले जाते. त्यातून जीवनसत्त्वे, खनिजे, तंतूमय पदार्थ आणि अन्य पोषक घटक उपलब्ध होतात.

केंद्रातील ऊर्जा चयापचय प्रयोगशाळेच्या संचालिका सुसॅन रॉबर्टस यांनी दिलेल्या माहितीनुसार, या अभ्यासामध्ये सहभागी व्यक्तींच्या आहार, वजन आणि खाद्य पदार्थांचा प्रकार यावर नियंत्रण ठेवण्यात आले होते. पूर्वीच्या वैद्यकीय चाचण्यामध्ये वजन नियंत्रणाशिवाय अन्य मुद्द्यावर फारसे लक्ष देण्यात आलेले नव्हते.