किडीचे प्रौढ त्यांच्या पिलांसह पानांच्या खालील बाजूस पांढऱ्या लोकरी आच्छादनाखाली राहून पानांतील रसाचे सातत्याने शोषण करतात. पाने पिवळी पडून सुकतात. लोकरी मावा कीटक शरीरातून मधासारखा द्रव सोडतात. तो पसरून पानांवर काळ्या बुरशीची वाढ झाल्याने प्रकाश संश्लेषण प्रक्रियेत अडथळा येतो, याचा उसाच्या वाढीवर अनिष्ट परिणाम होतो. उसाची वाढ खुंटते. कांड्या बारीक व आखूड निपजतात. उसाचे उत्पादन व साखरेचा उतारा घटतो. साखरेची प्रत खालावते. शेतातील पाण्याचा निचरा करावा. रुंद सरी अथवा पट्टा पद्धतीने उसाची लागवड करावी. लोकरी मावा ग्रस्त ऊसक्षेत्रातील बेणे लागणीसाठी वापरू नये. लोकरी मावाग्रस्त उसाच्या वाढ्याची अथवा ऊस बेण्याची वाहतूक नवीन प्रदेशात करू नये. लागवडीपूर्वी बेणेप्रक्रिया करावी. यासाठी ३०० मि.लि. मॅलाथिऑन (५० ईसी) प्रति १०० लिटर पाण्याच्या द्रावणात टिपऱ्या १० ते १५ मिनिटे बुडवून, सावलीत सुकवून लागवड करावी. ५ ग्रॅम मेटारायझियम ॲनासोप्ली प्रति लिटर पाण्यात मिसळून फवारणी करावी. लोकरी मावा खाणारे परभक्षी मित्रकीटक डिफा ॲफिडीव्होरा (एकरी ४०० अळ्या) व मायक्रोमस इगोरोटस (एकरी १००० अळ्या) या प्रमाणात लोकरी मावाग्रस्त ऊसपिकात सोडाव्यात. त्यानंतर या ठिकाणी रासायनिक कीटकनाशकांची फवारणी करू नये. संपर्क : मधुकर माळी ,९९६०४३०९७९ (कृषी विज्ञान केंद्र, तळसंदे, जि. कोल्हापूर)
