कृत्रिम बुद्धिमत्ता देतेय संशोधनाला गती

शेती, पीक उत्पादन आणि अन्नधान्यातील संशोधनामध्ये माहिती तंत्रज्ञानाचा वापर वाढू लागला आहे. त्याचबरोबरीने अलीकडे आर्टिफिशियल इंटिलिजन्सचा (कृत्रिम बुद्धिमत्ता) वापर माहितीच्या विश्लेषणासाठी करण्यात येत आहे. अमेरिकेतील स्टॅन्डफोर्ड विद्यापीठातील तज्ज्ञ सध्या विविध प्रश्नांची उकल करण्यासाठी कृत्रिम बुद्धिमत्तेच्या वापराबाबत अधिक संशोधन करीत आहेत. या माध्यामातून शेती तसेच इतर क्षेत्रांतील माहितीचा काटेकोर विश्लेषणातून वापर योग्य पद्धतीने करणे शक्य होणार आहे.

जगभरात शेती, आहार आणि आरोग्याबाबत जागृती होत आहे. वाढत्या लोकसंख्येला पुरेसे पोषणयुक्त अन्नधान्य उपलब्ध होण्यासाठी योग्य वेळी धोरणात्मक निर्णय घेणे आवश्यक असते. त्यासाठी कृत्रिम बुद्धिमत्ता तंत्रज्ञानाची मदत महत्त्वाची ठरत आहे. शेतीमध्ये लावलेले सेंन्सर संगणक प्रणालीला जमिनीतील ओलावा, पीकवाढ, कीड-रोगाचा प्रादुर्भाव, तापमानातील बदलांबाबत सातत्याने माहिती नोंदवितात. या माहितीचे विश्लेषणकरून निश्चितपणे पीक उत्पादनवाढीचा अंदाज घेणे शक्य होते. यातून योग्य पीक उत्पादनवाढ, शेतमालाचा योग्य वापर आणि नासाडी कमी करणे शक्य होईल.