तीव्र पावसाचा हायड्रोपोनिक्स स्ट्रॉबेरीला बसला कमी फटका

कॅलिफोर्नियातील अवकाळी आलेल्या तीव्र पावसाचा फटका स्ट्रॉबेरी पिकाला बसला आहे. ज्यांच्याकडे हरितगृह आणि हायड्रोपोनिक्स पद्धतींचा अवलंब होता त्यांना काही प्रमाणात आलेल्या पावसाचा फायदा झाल्याचे चित्र दिसून येत आहे. भांडवली गुंतवणूक अधिक असलेल्या आधुनिक पद्धतीचा अवलंब एकूण पिकाच्या उत्पादन वाढ आणि दर्जेदारपणा यासाठी उपयुक्त ठरल्याचे प्राथमिक पाहणीत दिसून आले. गेल्या काही दिवसांपासून कॅलिफोर्नियामध्ये पाऊस होत आहे. हिवाळ्यातील कोरड्या वातावरणाकडून ओल्या वसंताकडे वातावरणातील बदल निर्देश करत आहेत. या वातावरणाचा सर्वाधिक फटका नाजूक असलेल्या स्ट्रॉबेरी पिकाला बसतो. त्याविषयी माहिती देताना शेतकरी डेव्ह अकाहोशी यांनी सांगितले, की पावसामुळे स्ट्रॉबेरी उत्पादन हाती येण्यासाठी उशीर होणार आहे. सॅण्टा मारिया भागामध्ये साधारणतः वसंत ऋतू चांगला असतो. येथे उन्हाळ्यात काही प्रमाणात उशीर होतो. या वर्षीही एप्रिलपर्यंत स्ट्रॉबेरीचे लक्षणीय उत्पादन हाती येण्याची शक्यता दिसत नाही. वॅटव्हिले भागही उत्पादनामध्ये मागे आहे. वाढलेल्या आर्द्रतेमुळे करपा आणि अन्य रोगांचा प्रादुर्भावही वाढला आहे. पारंपरिक पद्धतीने उत्पादन घेणाऱ्या शेतकऱ्यांच्या समस्येत वाढ झाल्याच्या पार्श्वभूमीवर हायड्रोपोनिक्स पद्धतीने स्ट्रॉबेरी उत्पादन घेत असलेल्या शेतकऱ्यांकडे चांगले व दर्जेदार उत्पादन मिळण्याची शक्यता दिसत आहे. यातील अनेक शेतकऱ्यांकडे हरितगृहासारख्या पीक संरक्षणाची सोय आहे. अशास्थितीत तुलनेने थंड व आर्द्रतापूर्ण वातावरणामध्ये स्ट्रॉबेरी उत्पादनात वाढ होण्याची शक्यता हे उत्पादक व्यक्त करत आहेत. शेतकऱ्याचे प्रातिनिधिक उदाहरण ः डेव्ह अकाहोशी यांच्याकडे ४० एकर क्षेत्रावर हायड्रोपोनिक्स आणि हरितगृहामध्ये स्ट्रॉबेरी पीक आहे. हायड्रोपोनिक्स पद्धतीमध्ये सुरवातीला भांडवली गुंतवणूक अधिक असली तरी एकूण पिकांचे उत्पादन व सुरक्षितता पाहता उपयुक्तता अधिक असल्याचे दिसून आले. अवकाळी पावसामुळे शेतीमध्ये स्वच्छता ठेवण्यामध्ये अडचणी येतात. त्यावर या पद्धतीने मात करत आली. फळे चांगली मिळू शकतात. अकाहोशी यांनी सांगितले, की लागवड पद्धतींची तुलना करण्यासाठी सध्याची परिस्थिती चांगली आहे. पावसामुळे स्ट्रॉबेरीवरील परिणाम आधुनिक हायट्रोपोनिक्स पद्धतीमुळे तुलनेने कमी झाले. स्ट्रॉबेरी उत्पादनामध्ये व गोडीमध्ये वाढ झाल्याचे दिसून येते आहे. नेहमी वसंतामध्ये अनुभवायला येणाऱ्या स्थितीमुळे टनेल (हरितगृह) मधील पिकांच्या वाढीची स्थिती चांगली आहे.