भारतीय कृषी संशोधन संस्थेच्या भारतीय तेलबिया संशोधन संस्थेच्या वतीन करडईचे नवीन संकरित वाण डीएसएच १८५ विकसित करण्यात आले आहे. ही जात संपूर्ण भारतासाठी शिफारशीत आहे. ही अधिक उत्पादनक्षम जात असून, फ्युजारियम विल्ट रोगासाठी प्रतिकारक आहे. डीएसएच १८५ या जातीची वैशिष्ट्ये ः
डीएसएच १८५ हे वाण ए १३३ (सीजीएमएस लाइन) आणि १७०५ पी २२ (रिस्टोअर लाइन) यांच्या संकरातून नवीन जात विकसित केली आहे. मूळ जंगली प्रजाती Carthamus oxyacantha हा काही घटकांसाठी मूळ स्रोत म्हणून वापरला आहे. सरासरी बियांचे उत्पादन ः कोरडवाहूमध्ये १४.३ क्विंटल प्रतिहेक्टर आणि सिंचनाखाली २१ क्विंटल प्रतिहेक्टर इतके आहे. तुलनेसाठी राष्ट्रीय पातळीवरील सरासरी उत्पादन १७.४ क्विंटल प्रतिहेक्टर आहे. तेलाचे उत्पादन ः कोरडवाहू स्थितीमध्ये ४.१२ क्विंटल प्रतिहेक्टर असून, सिंचनाखाली ते ५.७ क्विंटलइतके आहे. राष्ट्रीय पातळीवरील सरासरी ४.८९ क्विंटल प्रतिहेक्टर आहे. ए१ आणि पीएनबीएस १२ या जातींच्या तुलनेमध्ये ही जात २५ ते ३० टक्के अधिक बिया उत्पादन देते. तर जीएमएस आधारीत राष्ट्रीय संकरित जात एनएआरआय-एच-१५ पेक्षा १५.२ टक्के अधिक उत्पादन देते. बियातील तेलांचे प्रमाण २८ ते २९ टक्के असून, अन्य ए १, पीएनबीएस १२ या जातींपेक्षा २५ ते २८ टक्के अधिक उत्पादन विविध चाचणी प्रक्षेत्रावर मिळाले आहे. ही जात करडईमध्ये प्रामुख्याने येणाऱ्या फ्युजारीयम विल्ट रोगासाठी प्रतिकारक आहे. राज्यनिहाय चाचण्यांतील उत्पादन ः ही जात देशातील महाराष्ट्र, मध्य प्रदेश, तेलंगणा, छत्तीसगड येथील कोरडवाहू आणि बागायती शेतकऱ्यांसाठी उपयुक्त ठरेल. डीएसएच १८५ जातीचे या राज्यातील चाचण्यांचे निष्कर्ष
छत्तीसगड - बियांचे उत्पादन (प्रतिहेक्टर) - कोरडवाहू १७ क्विंटल असून, पारंपरिक जात ए१ चे उत्पादन केवळ ५ क्विंटल मिळाले. महाराष्ट्र - सिंचनाखाली उत्पादन (प्रति हेक्टर) २१ क्विंटल असून, ए१ चे उत्पादन १६ क्विंटल मिळाले. तेलंगणा - कोरडवाहू स्थितीमध्ये उत्पादन १० ते १४ क्विंटल प्रतिहेक्टर मिळाले असून, राज्यातील पारंपरिक जात मंजिराचे उत्पादन ४ ते ५ क्विंटल मिळाले. 
