शेवाळांच्या एकत्रित उत्पादनातून मिळेल जैवइंधन शाश्‍वतता

शेवाळांच्या विविध प्रजातींच्या एकत्रित वापरातून जैवइंधनाच्या निर्मितीमध्ये शाश्‍वतता आणणे शक्य होणार असल्याचे मत मिशीगन विद्यापीठातील संशोधनात पुढे आले आहे. त्यासाठी बाह्य घटकांकडून होणाऱ्या उपद्रवावर मात करण्यासाठीही शेवाळांची जैवविविधता अत्यंत महत्त्वाची ठरणार आहे. या संशोधनाचे निष्कर्ष ‘जर्नल ग्लोबल चेंज बायोलॉजी- बायोएनर्जी’ मध्ये प्रकाशित करण्यात आले आहेत. जैवइंधनासाठी खाद्यपिकांखालील जमिनीचा वापर वाढल्यास त्याचे विपरीत परिणाम अन्नसुरक्षिततेवर होणार आहेत. त्यामुळे मिशीगन विद्यापीठातील ई. ए. जॉर्ज रिझर्व्ह या परिसरात ८० कृत्रिम तलावांमध्ये गोड्या पाण्यातील विविध शेवाळ प्रजातींच्या एकत्रित वाढवण्याचे प्रयोग करण्यात येत आहेत. यात शेवाळाच्या जैवविविधतेचा फायदा अधिक बायोमास उपलब्धीसाठी घेण्याचे नियोजन आहे. एकाच शेवाळाची वाढ करण्याला मोनोकल्चर पद्धती म्हणतात. त्यापेक्षा शेवाळांच्या विविध प्रजातींचे एकत्रित करून (त्याला पॉलिकल्चर म्हणतात.) त्यांच्या एकमेंकाच्या वाढीवर होणारे परिणाम तपासण्यात येत आहेत. त्याविषयी माहिती देताना संशोधिका केसी गोडविन यांनी सांगितले, की पॉलिकल्चर पद्धतीमध्ये मोनोकल्चरच्या तुलनेमध्ये अधिक बायोमास उपलब्ध होत नसल्याचे दिसून आले. मात्र, या पद्धतीमध्ये दीर्घळाळ शाश्‍वत उत्पादन देण्याची क्षमता असल्याचे आढळले.