पाण्यासह तेल, चिकट पदार्थांना दूर ठेवणारे रसायन विकसित

पाणी, तेल, अल्कोहोल आणि लोणी अशा विविध चिकट पदार्थांनाही दूर ठेवणारे रसायन तयार करण्यात मिशीगन विद्यापीठातील संशोधकांना यश आले आहे. अशा आवरणाचा वापर केलेल्या पृष्ठभागामुळे पाण्यामध्ये जहाजांचे घर्षण कमी होणार असून इंधनामध्ये मोठी बचत होऊ शकते. नौदलासह मानवरहित पाणबुड्यांसाठी ते उपयुक्त ठरणार आहे.    पाणी किंवा तेलासारख्या चिकट पदार्थांना दूर ठेवणारे (इंग्रजीमध्ये या गुणधर्माला ओमनीफोबिक असे म्हणतात) आवरण ही नवीन बाब नसली तरी एकाच वेळी अनेक द्रवांना दूर ठेवण्याची क्षमता ही महत्त्वाची ठरणार आहे. हे रसायन पारदर्शक आणि द्रवरूप असल्याने कोणत्याही पृष्ठभागावर लावणे सुलभ आहे. या रसायनाचा वापर सातत्याने पाण्यामध्ये वापराव्या लागणाऱ्या कृषी अवजारांचे आयुष्य वाढवण्यासाठी करणे शक्य आहे. डॉ. अनिष तुतेजा यांच्या मार्गदर्शनाखालील या संशोधनासाठी अमेरिकन नेव्हल रिसर्च यांनी आर्थिक मदत केली आहे.