चीनमध्ये काळ्या मक्याच्या उत्पादनाला वाढतेय मागणी

आपल्याला नेहमीच्या मक्यापासूनची विविध उत्पादने माहीत आहेत. त्यांचा वापरही मानवी आणि पशुआहारामध्ये केला जातो. मात्र, चीनमध्ये काळ्या रंगाच्या मक्याची लोकप्रियता वेगाने वाढत आहे. परिणामी, काळ्या रंगाच्या मक्याच्या लागवडीला चालना मिळत आहे. गडद रंगाच्या पिगमेंटमुळे या मक्यामध्ये अधिक पोषक गुणधर्म असतात, तसेच त्यातील साखरेचे प्रमाण ११.९५ टक्के असून, सामान्य मक्याच्या तुलनेत एक ते तीनपट अधिक आहे. गेल्या काही वर्षांमध्ये काळ्या रंगाच्या मका लागवडीमध्ये वेगाने वाढ झाली आहे. आधी बहुतांश शेतकरी पारंपरिक काळ्या मक्याच्या जातींची लागवड करत असत, पण त्याचे उत्पादन कमी असल्याने आर्थिकदृष्ट्या परवडत नसे.

अलीकडे विविध जातीही उपलब्ध होत असून, त्यातील क्षिन जून हे अॅन्थोसायनिन ब्लॅक स्विट १ या जातीखालील क्षेत्र अधिक आहे. ही अधिक उत्पादनक्षम संकरित जात असून, चवीलाही अधिक गोड आहे. सामान्यतः पीक ८५ ते ९० दिवसांमध्ये पक्वता गाठते. अगदी वाळवण्यासह कालावधी ११५ दिवसांपर्यंत जातो. त्याचप्रमाणे काढणीच्या वेळी या मक्याच्या दाण्यांचा रंग हा लाल-जांभळा असतो. पुढे प्रक्रियेदरम्यान शिजवल्यास त्याला अधिक आकर्षकता मिळते. परिणामी, विविध प्रक्रिया उत्पादनामध्ये या मका जातीला अलीकडे प्राधान्य दिले जात आहे.

या काळ्या रंगाचा मका वाळवून त्यापासून पीठ तयार केले जाते. या पिठाचा वापर बेकरी उद्योगामध्ये वाढला आहे. चीनसह हॉंगकॉग व अन्य देशांमध्ये या उत्पादनांना चांगली मागणी आहे.

या जातीचे संकरीरित बियाणे बनवणाऱ्या कंपनीच्या प्रवक्यांनी दिलेल्या माहितीनुसार, प्राधान्याने मका जातींच्या संकरित जातीच्या पैदाशीसोबतच बीजोत्पादनावर लक्ष केंद्रित केले आहे. ही बियाणे चीनच्या पूर्व, उत्तर आणि नैर्ऋत्य भागांमध्ये व पिवळ्या नदीच्या परिसरात विकली जातात. त्याचप्रमाणे अन्य भाजीपाला पिकांच्या बियाणांची निर्मिती व विक्रीही कंपनी करत आहे.