कर्बवायूंचे वाढते प्रमाण गोड्या पाण्यासाठीही ठरतेय धोकादायक

वातावरणातील वाढत्या कर्बवायूंचा फटका गोड्या पाण्यातील जलचरांनाही बसत असल्याचा पहिला पुरावा जर्मनीतील संशोधकांना आढळला आहे. जर्मनीतील चार तलावांमध्ये केलेल्या अभ्यासामध्ये सूक्ष्म जलचरांमध्ये संरक्षक प्रणाली विकसित होत असल्याचे दिसून आले आहे. वातावरणातील कार्बन डायऑक्साईडचे प्रमाण वाढत असून, तो सागरी पाण्यामध्ये विरघळण्याचे प्रमाणही वाढले आहे. परिणामी सागरी पाण्याची आम्लता वाढण्याचा धोका आहे. त्याचा फटका जलचरांसह सागरी पर्यावरणाला बसणार आहे. गोड्या पाण्यामध्येही अशा प्रकारे कार्बन डायऑक्साईड विरघळत असल्याचा पहिला पुरावा जर्मनी येथील रुहेर विद्यापीठातील संशोधकांना आढळला आहे. त्याची माहिती ‘करंट बायोलॉजी’ या संशोधन पत्रिकेमध्ये प्रकाशित करण्यात आली आहे. या अभ्यासात गोड्या पाण्यामध्ये कार्बन डायऑक्साईडचे प्रमाण वाढत आहे. जल पर्यावरणामध्ये वाढत असलेल्या ताणाला pCO२ (partial pressure of CO२) असा खास शब्द वापरला आहे. कर्बवायूंच्या वाढत्या प्रमाणामुळे आम्लतेचे प्रमाण वाढत आहे. आतापर्यंत केवळ सागरी पर्यावरणावर परिणामकारक असल्याचे मानले जात असलेल्या या समस्येमुळे गोड्या पाण्यातील पर्यावरणावरही विपरीत परिणाम दिसून येत असल्याचे लिंडा वैस यांनी सांगितले. वैस आणि त्यांच्या सहकाऱ्यांनी जर्मनीतील चार तलावांतील जलचरांचे निरीक्षण केले आहे. माहितीच्या विश्लेषणासाठी १९८१ ते २०१५ या काळातील कर्बवायूंच्या पाण्यातील प्रमाणाचे विश्लेषण केले आहे.