शहरात जगण्यासाठी शिकताहेत हुशार प्राणी !

शहरामध्ये राहण्यासाठी आवश्यक त्या बाबी अनेक प्राणी शिकत असून, भविष्यामध्ये या प्राण्यांसोबत मानवांचा संघर्ष वाढण्याची शक्यता युनिव्हर्सिटी ऑफ व्योमिंग येथील संशोधकांनी व्यक्त केली आहे. माणसांची वस्ती जंगल परिसरामध्ये वाढत असून, वाढत्या शेतीक्षेत्रामुळे जंगली प्राण्याचे रहिवासक्षेत्र कमी होत आहे. अशा स्थितीमध्ये माणूस आणि जंगली प्राण्यांतील संघर्ष वाढत जाण्याची शक्यता आहे. माकडांसारख्या अनेक हुशार प्राण्यांनी माणसांसह शहरामध्ये जगण्याच्या विविध पद्धती शिकून घेतल्याचे दिसून येत आहे. याबाबत लिसा पी. बॅरेट, लॉरेन स्टॅंटन आणि साराह बेन्सन- अॅमराम यांनी केलेल्या अभ्यासाचे निष्कर्ष जर्नल अॅनिमल बिव्हेवियर मध्ये प्रकाशित करण्यात आले आहेत. माणसांशी जंगली प्राण्याचा संघर्ष वाढत जाणार आहे. आजही ग्रामीण भागामध्ये जंगली प्राण्यांचा वावर आढळून येतो. आता तो शहरी भागातही वाढत जाणार आहे. नव्या रहिवासामध्ये जगण्यासाठी आवश्यक त्या बाबी हे प्राणी शिकत आहे. विविध समस्या सोडवणे, स्मरणशक्ती, वर्तनामधील लवचिकता यामुळे ते यशस्वी होताना दिसत आहे.