ज्वारी - भुईमुग आंतरपिकासाठी खताचे नियोजन झाले सोपे

आफ्रिकेच्या काही भागामध्ये शेतकरी ज्वारीमध्ये भुईमुगाचे आंतरपिक घेतात. मात्र, या पिकांच्या उत्पादनवाढीसाठी आवश्यकत माहिती उपलब्ध नसल्याचे चित्र आहे. निगर, माली आणि अमेरिकेतील संशोधकांनी प्रामुख्याने आंतरपीक पद्धतीमध्ये खतांचे नियोजन करण्यासंदर्भातप्रयोग केले असून, खास गणिती सूत्र बनवले आहे. त्यामुळे शेतकऱ्यांना स्थानिक परिस्थितीनुसार खतांचे योग्य नियोजन करणे शक्य होणार आहे. हे संशोधन ‘अॅग्रोनॉमी जर्नल’ मध्ये प्रकाशित झाले आ हे. आंतरपीक पद्धतीसाठी योग्य त्या शिफारशी देण्यासाठी निगर, माली आणि अमेरिकेतील संशोधकांनी प्रयत्न सुरू केले आहेत. प्रत्यक्ष उत्पादन आणि माहिती यातील फरक कमी करण्यासाठी धडपड सुरू केली आहे. त्याविषयी माहिती देताना युनिव्हर्सिटी ऑफ नेब्रास्का-लिंकन येथील कृषीविद्या तज्ज्ञ चार्ल्स वॉर्टमॅन यांनी आंतरपिकाची उत्पादकता वाढविण्यासाठी खतांचे योग्य प्रमाण काढण्यासाठी गणिती सूत्र तयार केले आहे. यामध्ये स्थानिक माहितीचा समावेश करण्यात आल्याने अचूकता मिळते. योग्य प्रमाणात खतांचा वापर केल्याने खर्चामध्ये बचतही साधते. अशा प्रकारचे संशोधन यापू्र्वी भात आणि मका या एकल पिकांसाठी झाले होते. चार्ल्स वॉर्टमॅन यांनी सांगितले, की पिकाची उत्पादकता आणि उत्पादन वाढविण्यासाठी खतांचा योग्य प्रमाणात वापर करण्याची आवश्यकता असते. यात अन्नसुरक्षेसोबत गरिबीचे दुष्टचक्र भेदण्याचीही क्षमता आहे.