इंग्लंडमधील प्रदूषणाचे अचूक नकाशे केले तयार

हवेचे प्रदूषण काही केवळ भारतीय उपखंडातील समस्या राहिलेली नाही. ती इंग्लंडसारख्या विकसित देशातही तितक्याच तीव्रतेने जाणवत आहे. लेईसिस्टर विद्यापीठातील संशोधकांनी हवेमध्ये होणारे प्रदूषण प्रामुख्याने नायट्रोजन डाय ऑक्साईडच्या प्रमाणात झालेल्या बदलांचा अभ्यास केला आहे. या बदलत्या प्रमाणाचे नकाशे तयार करण्यात आले असून, त्यासाठी लेईसिस्टर विद्यापीठ आणि ‘अर्थ सेन्स’ यांनी एकत्रितरीत्या हवाई नकाशे बनविणाऱ्या ‘ब्लुस्काय’ या कंपनीसोबत काम केले आहे.

शेतीमध्ये नत्रयुक्त खतांच्या अतिरिक्त वापरामुळे हवेतील नायट्रोजन डाय ऑक्साईडचे प्रमाण वाढत आहे. औद्योगिकीकरण व वाहनाद्वारे होणारे प्रदूषण यांचीही समस्या मोठी आहे. उपग्रहाद्वारे मिळालेल्या हवेच्या गुणवत्तेविषयीच्या माहितीची सांगड अर्थ सेन्स या माहितीसाठ्याशी घालून, त्यातून उच्च प्रतिचे नकाशे मिळविण्यात आले आहेत. संपूर्ण इंग्लंडमधील १०० मीटर रिझॉल्युशन क्षमतेचे हे नकाशे आहेत. त्याविषयी माहिती देताना अर्थ सेन्स सिस्टिम्सचे व्यवस्थापकीय संचालक जेम्स इड्डी यांनी सांगितले, की हवेच्या प्रदूषणाची समस्या जगभरात सर्व देशांमध्ये जाणवत आहे; मात्र प्रदूषणाचे नेमके प्रमाण व स्थान याविषयी माहितीची उपलब्धता नाही. त्यामुळे या समस्येवर उपाययोजना करण्यामध्ये अडचणी येतात. मॅप एअरद्वारे देशातील प्रत्येक रस्त्यावरील परिस्थितीची माहिती उपलब्ध होऊ शकेल.