कर्बवायूपासून मिथेनॉल निर्मितीचा वेग वाढणार चार पटीने

पेन स्टेट युनिव्हर्सिटी येथील संशोधकांनी कार्बन डाय ऑक्साईड या वायूपासून मिथेनॉल निर्मिती करण्याची प्रक्रिया तीन ते चार पटीने अधिक वेगवान करणारा उत्प्रेरक मिळवला आहे. यामुळे प्रदूषणकारक अशा वायूपासून इंधन मिळवण्याचा मार्ग खुला होणार आहे. वातावरणातील कार्बन डाय ऑक्साईडची तीव्रता वाढत असून, त्याचा जागतिक हवामानावर परिणाम होत आहे. कर्बवायूंचे उत्सर्जन कमी करण्यासाठी सातत्याने प्रयत्नही होत आहे. त्यातील एक दृष्टीकोन कार्बन डायऑक्साईडचा वापर कर्ब स्रोत म्हणून हायड्रोजनच्या प्रक्रियेमध्ये वापरण्याचा आहे. यात अपारंपरिक ऊर्जेचा वापर करून पाण्यातील हायड्रोजन वेगळा करून, त्याचा मिथेनॉल तयार करण्यासाठी वापरता येईल. हे मिथेनॉल सध्याच्या खनिज इंधनाची जागा घेऊ शकते. या प्रक्रियेचा वेग वाढवण्यासाठी चीन येथील दालियन तंत्रज्ञान विद्यापीठ आणि पेन स्टेट येथील ऊर्जा संशोधन केंद्रातील संशोधकांनी एकत्रितपणे संशोधन केले आहे. त्यातून त्यांनी पॅलॅडियम आणि तांबे यांपासून विशिष्ट फॉर्म्युलेशनद्वारे एक उत्प्रेरक (कॅटॅलिस्ट) तयार केला आहे.

या दोन्ही धातूंचे अणू अत्यंत अचूक गुणोत्तरामध्ये एकत्र केले असून, त्यातून तयार होणारे उत्प्रेरक सच्छिद्र आणि वॉलनटच्या आकाराचे असते. त्याचे अंतर्गत पृष्ठफळ फुटबॉलच्या मैदानाइतके आहे. या उत्प्रेरकामुळे मिथेनॉलचे उत्पादन नुसत्या पॅलॅडियमपेक्षा तीन पट अधिक, तर नुसत्या तांब्यापेक्षा चार पटीने अधिक वाढते. हे संशोधन ‘एसीएस कॅटॅलिसिस’ या संशोधनपत्रिकेमध्ये प्रकाशित केले आहे.