हिरव्या शहरांसाठी युरोपीय महासंघाने घेतला पुढाकार

वातावरणातील बदल आणि त्यातून उद्भवणाऱ्या विविध समस्यांशी सामना करण्यासाठी पर्यावरणपूरक उपाययोजनांचा माहिती सर्वांपर्यंत पोचवण्याच्या उद्देशाने युरोपियम महासंघाने ग्रीन सिटीज फॉर सस्टेनेबल युरोप या माहिती आधारित व्यासपीठाची उभारणी केली आहे. वाढत्या शहरीकरणामुळे शहरातील हिरवळ केवळ सुशोभीकरणापुरतीच राहिली असल्याचे चित्र सर्वत्र दिसते. त्याचा फारसा फायदा माणसांना, जैवविविधता, वातावरणासाठी होत नाही. त्यामुळे युरोपियन शहरातील सार्वजनिक जागा अधिक हिरव्या करण्याचा उद्देश यात ठेवण्यात आला आहे. त्यासाठी आवश्यक ती सर्व शास्त्रीय संशोधन आणि नावीन्यपूर्ण कल्पना यांची माहिती विविध व्यावसायिक, सामान्य लोकांपर्यंत पोचवली जात आहे. त्यातून आरोग्य, वातावरण, अर्थव्यवस्था, जैवविविधता आणि सामाजिक समरसता या अनुषंगाने विचार करण्यात येत आहे. हिरव्या युरोपसाठी खास अनुदान विविध विशेष सामाजिक कार्यक्रम, समाज माध्यमावरील मोहिमा, जाहिराती यासाठी युरोपीय महासंघाकडून खास अनुदान देण्यात येत आहे. त्यातून हरित व्यावसायिक समुदायाची निर्मिती होऊ शकेल. शाश्वत युरोपाच्या दृष्टीने हिरव्या शहराची आवश्यकता या कार्यक्रमातून अधोरेखित करण्यात आली आहे. या कार्यक्रमामध्ये बेल्जियम, बल्गेरीया, डेन्मार्क, जर्मनी, इंग्लंड, फ्रान्स आणि नेदरलॅंड या देशांनी पुढाकार घेतला आहे.