पूर्व आणि दक्षिण आशियामध्ये प्राणघातक एन्सेफॅलिटीसच्या प्रसारासाठी ‘जपानीज एन्सेफॅलिटीस’ (जेई) विषाणू कारणीभूत असतो. हा पारंपरिकपणे ग्रामीण भागातील रोग असला, तरी कंबोडियातील शहरी भागामध्येही वराहांत त्याचा प्रसार वेगाने वाढत आहे. या रोगाचा प्रादुर्भाव टाळण्यासाठी प्रवाशांना लसीकरणाची आवश्यकता व्यक्त करण्यात आली आहे. हे निष्कर्ष ‘प्लॉस निगलेक्टेड ट्रॉपिकल डिसिजेस’मध्ये प्रकाशित करण्यात आले आहेत. ‘जपानीज एन्सेफॅलिटीस’ (जेई) हा डासांद्वारे प्रसारित होतो. स्थानिक वराह हे त्याचे प्राथमिक यजमान असले, तरी बहुतांशी पृष्ठवंशीय प्राण्यांमध्ये त्याचा प्रादुर्भाव होतो. जागतिक आरोग्य संघटनेच्या अहवालानुसार, प्रतिवर्ष ६८ हजार लोकांमध्ये प्रादुर्भाव होतो. त्यातील १५ हजार लहान मुले असून, त्यांच्यामध्ये मृत्यूचे प्रमाण मोठे असते. ग्रामीण भागातील विशेषतः भात शेती आणि वराहपालन होत असलेल्या प्रदेशात या रोगाचा धोका अधिक असतो. कंबोडिया येथील इन्स्टिट्यूट पाश्चर ड्यू कंबोज येथील ज्युलियट डी फ्रान्सिस्को व त्यांच्या सहकाऱ्यांनी फ्रेंच ‘अॅग्रिकल्चरल रिसर्च सेंटर इंटरनॅशनल डेव्हलपमेंट’ (CIRAD) यांनी केलेल्या संशोधनाचा धागा पकडून अभ्यासाला सुरवात केली. या अभ्यासासाठी २०१५ मध्ये ग्रामीण व अर्धशहरी भागातील प्रत्येकी १५ वराहांवर लक्ष केंद्रित केले. दर ८ ते ११ दिवसांनी त्यांचे रक्तनमुने घेऊन, त्याचे विश्लेषण जेई अॅण्टिबॉडीज आणि विषाणू आरएनएसाठी केले. दोन्ही गटांतील सहा महिने वयाच्या सर्व पिल्लांमध्ये जेई प्रादुर्भाव आढळला. प्रादुर्भावाचे प्रमाण दोन्हीकडेही सारखेच (अनुक्रमे ०.६१ आणि ०.६९ प्रतिदिन) आढळले. संशोधकांना जेई विषाणूंच्या सहा वेगळ्या प्रजाती आढळल्या. थोडक्यात, कंबोडियाच्या केवळ ग्रामीणच नव्हे, तर अर्धशहरी भागातही जेई विषाणूंचा प्रादुर्भाव सारख्याच तीव्रतेने होतो. परिणामी लसीकरणासाठीच्या धोरणामध्येही बदल करण्याची आवश्यकता संशोधकांनी व्यक्त केली आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.