बियांच्या प्रवासाचा मागोवा घेण्यासाठी उपकरण विकसित

अनेक वनस्पतींच्या बिया या आकाराने लहान असल्यामुळे त्यांचे वितरण किंवा हालचाल यांचा मागोवा घेण्यामध्ये अनेक अडचणी येतात. यावर मात करण्यासाठी मिन्निसोटा विद्यापीठातील संशोधकांनी विद्युत अभियांत्रिकी आणि गणितीय प्रारूपांची सांगड घातली आहे. त्यातून एक उपकरण विकसित केले आहे. प्रत्येक सजीव हा आपल्या अन्नासाठी किंवा प्रजोत्पादनासाठी सातत्याने प्रयत्न करत असतो. या प्रक्रियेमध्ये त्यांची हालचाल, प्रवास किंवा स्थलांतर होत असते. मात्र, वनस्पतींची मुळे एकदा रुजली की त्यांना ती जागा सोडून जाणे शक्य होत नाही. मात्र, हीच प्रक्रिया त्यांच्या बीजाद्वारे होत असते. कोणत्याही वनस्पतींचा पर्यावरणातील अभ्यास करण्यासाठी या प्रवासाचा मागोवा संशोधक घेत असतात. मात्र, असा मागोवा घेण्यामध्ये बियांचा आकार जर खूपच लहान असल्यास अडचणी येतात. यावर मार्ग काढण्यासाठी मिन्निसोटा विद्यापीठातील जैवशास्त्र महाविद्यालयातील संशोधकांनी विद्यूत अभियांत्रिकी आणि गणितीय प्रारुपांची सांगड घातली आहे. या संशोधनाचे निष्कर्ष इकॉलॉजी या संशोधनपत्रिकेमध्ये प्रकाशित करण्यात आले आहेत. संशोधनाविषयी माहिती देताना संशोधक अॅडम क्लार्क यांनी सांगितले, की बियांचा टर्मिनल वेग (म्हणजेच खाली पडत असताना किंवा वाऱ्यासोबत जाण्याचा स्थिर वेग) मोजण्यासाठी आम्ही उपकरण तयार केले आहे. या स्थितीमध्ये अन्य माहिती उदा. झाडाची किंवा वनस्पतीची उंची, स्थानिक वाऱ्याची दिशा व वेग अशा माहितीची सांगड घालण्यात आली. त्यातून बिया नेमक्या किती लांबपर्यंत प्रवास करू शकतील, याचा अंदाज मिळवणे शक्य होते.