गम्मत नाही, खरचं.... ब्रिटनने नेमला एकाकीपणासाठी मंत्री !

आधुनिक जगामध्ये एकाकीपणा ही मोठी समस्या ठरत आहे. प्रामुख्याने वार्धक्य आणि अपंगत्व यांच्या जोडली जाणारी ही समस्या कोणत्याही सामान्य व्यक्तीच्या आयुष्यामध्ये कोणत्याही काळात येऊ शकते. या समस्येवर मात करण्यासाठी ब्रिटनने वेगळे मंत्रालय तयार करण्याचा निर्णय घेतला आहे.

आधुनिक काळामध्ये इंटरनेट आणि डिजिटल माध्यमांनी आभासी पातळीवर लोक जोडले जात असल्याचा दावा केला जातो. मात्र, वाढते औद्योगिकीकरण आणि बदलत चाललेली जीवनशैली यामुळे एकाकीपणामध्ये वाढ होत आहे. एकाकीपणा ही एक गुंतागुंतीची भावनिक स्थिती असून, त्यातून व्यक्ती टोकाच्या नैराश्यापर्यंत पोचू शकते. एकाकीपणामागील कारणेही व्यक्ती आणि समाजनिहाय वेगवेगळी असू शकतात. एकाकीपणामुळे उच्च रक्तदाब, कोलेस्टेरॉलचे वाढते प्रमाण, स्थौल्यत्त्व यासोबतच पक्षाघात आणि हृदयरोगाचा धोका वाढू शकतो. केवळ एकाकीपणामुळे माणसांच्या पर्यायाने समाजाच्या आरोग्यावर विपरीत परिणाम होऊ शकतात. या समस्येवर नेमकेपणाने काम करण्यासाठी ब्रिटनच्या पंतप्रधान थेरेसा मे यांनी एकाकीपणासाठी वेगळा मंत्री नेमण्याची घोषणा केली आहे. हा मंत्री विविध उद्योग आणि स्वयंसेवी संस्था यांच्या सहकार्याने या समस्या सोडविण्यासाठी काम करेल.

जागतिक समस्या... केवळ इंग्लंडच नाही, तर जगभरामध्ये एकाकीपणा ही मोठी समस्या ठरत आहे. अमेरिकेमध्येही एकूण लोकसंख्येच्या सुमारे २० टक्के (६० दशलक्ष) लोक हे एकाकीपणाच्या छायेत आहेत. इंग्लंडमधील संसदपटू जो कॉक्स (वय ५२) यांनी एकाकीपणाची समस्या ओळखली होती. त्यावर मार्ग काढण्यासाठी ‘जो कॉक्स कमिशन ऑन लोनलीनेस’ स्थापन केले होते. जो कॉक्स यांची नियो-नाझी गटाच्या मारेकऱ्याकडून २०१६ मध्ये हत्या करण्यात आली होती. त्यांच्या कमिशनने केलेल्या शिफारशींची ब्रिटिश शासनाने ही अंमलबजावणी सुरू केली आहे.