| सर्व द्राक्ष विभागांमध्ये सोमवारपर्यंत अधूनमधून फक्त ढगाळ वातावरण राहण्याची शक्यता आहे. सोमवारी सांगलीच्या काही भागामध्ये हलका पाऊस होण्याची शक्यता आहे. मंगळवारी नाशिकच्या दक्षिणेकडील भागात पावसाची शक्यता आहे. हा अपवाद वगळता सर्व द्राक्ष विभागांमध्ये येत्या बुधवारपर्यंत वातावरण उष्ण राहील. ज्या ज्या ठिकाणी ढगाळ वातावरण राहील, तिथे दुपारचे तापमान कमी (३७ ते ३९ अंशांपर्यंत) होईल. अशा वातावरणामध्ये मागील काही दिवसानंतरच्या पावसानंतरसुद्धा कोणत्याही रोगांच्या वाढण्याची शक्यता दिसत नाही. खालील दोन गोष्टी महत्त्वाच्या आहेत. १) काही भागामध्ये गारपिटीमुळे पाने फाटली, हिरव्या काडीवर जखमा झाल्याचे दिसून येत आहे. हिरव्या काडीवरील जखमा काही उपाययोजनेशिवायही भरून येतील. तो तसा काळजीचा विषय नाही. फाटलेली पाने किंवा झालेल्या जखमांमधून जिवाणू करपा किंवा मोट्रीओडिप्लोडिया सारख्या बुरशा काडीमध्ये वाढण्याची शक्यता असते. अशा बुरशांची वाढ होऊ नये म्हणून कार्बेन्डाझिम १ ग्रॅम किंवा थायोफिनेट मिथाईल ०.७५ ग्रॅम अधिक मॅन्कोझेब २ ग्रॅम प्रति लिटर प्रमाणात मिसळून फवारावे. २) गरम हवामानामध्ये ऑक्झिन्स अधिक प्रमाणात बनतात. ऑक्झिन्स जास्त वाढल्यामुळे केवळ शेंडा वाढण्याऐवजी सर्वच बगलफुटी अधिक वाढू लागतात. काही ठिकाणी जास्त वाढ झाल्याने गाठीही बनतात. या सर्व फुटी व गाठी या कवकुवत असल्याने वाऱ्याने तुटतात किंवा पिचकतात. याला बहुतांशी लोक रोग किंवा किडीचा प्रादुर्भाव समजतात. मात्र, हा कोणत्याही प्रकारचा रोग नाही. तापमान ढगाळ वातावावरणामुळे कमी झाल्यास ते आपोआप सुधारेल. बहुतांशी ठिकाणी नवीन लागवडीच्या बागेमध्ये ही समस्या जास्त दिसते. दुपारच्या वेळी अशा झाडांमध्ये पाणी फवारल्यास दुपारच्या तीव्र तापमानापासून झाडांचे संरक्षण करता येईल. जुन्या बागेमध्ये दोन ओळीमध्ये सावलीसाठी शेडनेट लावलेले असते. ते तसेच ठेवल्यास त्याचाही उन्हाची तीव्रता कमी करण्यासाठी फायदा होईल. | |||
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.