रब्बी ज्वारी लागवडीसाठी मूलस्थानी जलसंधारण केल्यानंतर उताराला आडवी मशागत करून जमिनीतील चांगल्या ओलाव्यावर पेरणी करावी. जमिनीच्या खोली व प्रकारानुसार रब्बी ज्वारीच्या जातींची निवड करावी. माती परिक्षणानुसार रासायनिक खतांची मात्रा द्यावी.
रब्बी ज्वारीचे चांगले उत्पादन घेण्यासाठी कोरडवाहू तंत्रज्ञान व नवीन जातींचा जाणीवपूर्वक वापर केल्यास उत्पादनात २०-२५ टक्क्यांनी वाढ होते. रब्बी ज्वारीसाठी मूलस्थानी जलसंधारण केल्यानंतर उताराला आडवी मशागत करून जमिनीतील चांगल्या ओलाव्यावर पेरणी करावी. जमिनीच्या खोली व प्रकारानुसार रब्बी ज्वारीच्या जातींची निवड करावी. उदा. हलक्या जमिनीसाठी अनुराधा, मध्यम जमिनीसाठी फुले चित्रा, फुले सुचित्रा, परभणी मोती व मालदांडी ३५-१ तसेच भारी जमिनीसाठी फुले वसुधा, फुले यशोदा, पी के व्ही क्रांती, परभणी मोती या जातींची निवड करावी. बागायती ज्वारीसाठी फुले रेवती, फुले वसुधा आणि हुरड्यासाठी फुले मधुर या जातींची लागवड करावी. पेरणीपूर्वी एक किलो बियाण्यास ४ ग्रॅम गंधक, २५ ग्रॅम ॲझोटोबॅक्टर आणि २५ ग्रॅम पीएसबी या जीवाणू संवर्धनाची प्रक्रिया करावी. म्हणजे उगवण चांगली होऊन जोमदार पीक येते. पेरणीच्या वेळी ५० किलो नत्र,२५ किलो पालाश, २५ किलो पालाश प्रतिहेक्टरी पेरून द्यावेत. जमिनीतील ओलावा जास्त काळ टिकवून ठेवण्यासाठी पेरणीनंतर एक निंदणी करून तिसऱ्या, पाचव्या व आठव्या आठवड्यात कोळपणी करावी. त्यामुळे ताटांना माती लागते आणि बाष्पीभवन कमी होण्याबरोबरच ताटे पडत नाहीत व खडखड्या रोगाचे नियंत्रणही करता येते. कोरडवाहू ज्वारी फुलोऱ्यात असताना एखादे संरक्षित पाणी दिल्यास उत्पन्नात ३० ते ३५ टक्क्यांनी वाढ मिळते. बागायती रब्बी ज्वारीसाठी पाणी व्यवस्थापन करताना २८ ते ३० दिवसांनी पहिले पाणी, पीक पोटरी पडून फुलोऱ्यात असताना (७०-७५) दुसरे पाणी आणि दाणे भरण्याच्या अवस्थेत (९०-९५) तिसरे पाणी द्यावे. संपर्क ःडॉ. विजय अमृतसागर, ९४२१५५८८६७ (विभागीय कृषी संशोधन केंद्र, सोलापूर.)