हळदीचे गड्डे तयार होण्याची ही योग्य वेळ आहे. जर तापमान फारच कमी झाले तर हळद पिकावर विविध किडी-रोगांचा प्रादुर्भाव होतो. परिणामी गड्ड्यांची संख्या आणि आकार कमी होतो. किडींचे वेळीच नियंत्रण करणे गरजेचे असते. सध्या हळद लागवड होऊन पाच महिन्यांचा कालावधी (१५० दिवस) पूर्ण झाला आहे. या कालावधीमध्ये हळद पीक वाढीच्या दोन अवस्था जसे उगवण आणि शाकीय वाढ पूर्ण झालेल्या असतात. या अवस्थेमध्ये हळदीला फुटवे येतात तसेच हळदीच्या नऊ महिन्यांच्या कालावधीमध्ये येणाऱ्या एकूण पानांची संख्या आणि उंची या अवस्थेमध्ये निश्चित होत असते.
उगवण आणि शाकीय वाढ यानंतर हळद पीक वाढीची पुढील दोन महिन्यांची (१५० ते २१० दिवस) अवस्था म्हणजे हळद पिकास हळकुंड फुटण्यास सुरवात होते. जे काही नव्याने फुटवे आले असतात त्या फुटव्यांपासून हळकुंड येण्याचा हा कालावधी असतो. या वेळी वातावरणातील तापमानात घट होत असते. साधारणतः २० ते २५ अंश सेल्सिअस तापमानाला हळकुंड फुटत असतात. हळदीचे गड्डे तयार होण्याची ही योग्य वेळ आहे. जर तापमान फारच कमी झाले तर हळद पिकावर विविध किडी-रोगांचा प्रादुर्भाव होतो. परिणामी गड्ड्यांची संख्या आणि आकार कमी होतो. योग्य व्यवस्थापनासाठी कीड व रोगाचे वेळीच नियंत्रण करणे गरजेचे असते. लांबलेला पावसाळा कंदमाशीसाठी अधिक प्रमाणात अनुकूल असतो. कंदमाशीमुळे ४५ ते ५० टक्के नुकसान होते. ही कीड ऑक्टोबरपासून ते पिकाच्या काढणीपर्यंत नुकसान करते. क्विनॉलफॉस (२५ टक्के प्रवाही) २ मि.ली किंवा डायमेथोएट (३० टक्के प्रवाही) १ मि.ली. १५ दिवसांच्या अंतराने गरजेनुसार फवारावे. उघडे पडलेले कंद मातीने झाकून घ्यावेत. वेळेवर हळदीची भरणी करावी. हळद पीक काढल्यानंतर शेतात राहिलेल्या पिकांचे अवशेष सडके कंद नष्ट करावेत. हेक्टरी ६ पसरट भांडी (माती अथवा प्लॅस्टिकची) वापरून प्रत्येक भांड्यात २०० ग्रॅम एरंडीचे बी घेऊन त्यात १.५ लिटर पाणी मिसळावे. ८ ते १० दिवसांनी या मिश्रणाचा विशिष्ट असा वास येऊ लागल्यावर कंदमाशा आकर्षित होऊन मरू लागतात. या किडीची अळी नुकसानकारक असते. अळ्या मुळे कुरतडतात. जास्त प्रादुर्भाव झालेल्या भागात कंदही कुरडतात. मुळे कुरुतडल्यामुळे पीक पिवळे पडते, रोपे वाळू लागतात व उपटल्यास सहज उपटून येतात. संध्याकाळच्या वेळेला या किडीचे भुंगेरे बाहेर पडतात. ते गोळा करून रॉकेलमिश्रित पाण्यात टाकून नष्ट करावेत. ४ मि.ली. क्लोरपायरीफॉस प्रती लिटर पाण्यात घेऊन आळवणी करावी. जैविक नियंत्रणासाठी मेटॅरायझियम अॅनिसोप्ली ही हे बुरशीजन्य कीटकनाशक हेक्टरी ५ किलो या प्रमाणात शेणखतात मिसळून वापरावी.