नामपूरच्या कांदा उत्पादकांचे आजपासून आंदोलन

नामपूर, जि. नाशिक : येथील कृषी उत्पन्न बाजार समितीतील कांदा व्यापाऱ्याने थकवलेली ३६ लाख रुपयांची देणी ३ मे रोजी देण्याचे आश्‍वासन पुन्हा एकदा पाळले नाही गेले. यामुळे संतप्त शेतकऱ्यांनी आज (मंगळवार)पासून बाजार समितीच्या आवारात गेटबंद आंदोलन आणि बेमुदत उपोषण करण्याचा लेखी इशारा दिला आहे. कांदा लिलावानंतर दोन ते तीन महिने पेमेंट अदा झाले नव्हते. याप्रश्‍नी संतप्त शेतकऱ्यांनी १७ एप्रिलला नामपूर बाजार समितीचे सभापती यांच्या दालनात ठाण मांडला होते. सुमारे सव्वाशेहून अधिक शेतकऱ्यांच्या अडकलेल्या सुमारे ३६ लाख रुपयांच्या रकमेसाठी बाजार समिती प्रशासनाने पाठपुरावा सुरू केला. येथील बाजार समितीच्या आवारात सटाणा येथील कांदा व्यापारी अकील शेख यांनी दिलेले चेक जानेवारी महिन्यापासून वटतच नसल्याने शेतकरी संतप्त झाले होते. याबाबत बाजार समिती प्रशासनाकडे शेतकऱ्यांनी तक्रारी आल्यानंतर मार्च महिन्यापासून बाजार समितीमधील शेख याची खरेदी थांबविण्यात आली.  

नवीन आर्थिक वर्षात त्यांच्या परवाना नूतनीकरण रोखण्यात आले. अन्य राज्यामधील व्यापाऱ्यांकडे पैसे अडकल्याने शेतकऱ्यांच्या देणे देण्यास विलंब होत असल्याचे शेख यांनी सांगितले होते, यापूर्वी १७ एप्रिलला सर्व शेतकऱ्यांचे थकीत पैसे अदा करेन, असे लेखी आश्वासन शेख यांनी दिले होते, मात्र पेमेंट दिले नाही, पुन्हा ३ मेची तारीख देण्यात आली. परंतु शेतकऱ्यांना अद्यापही रक्कम न मिळाल्याने शेतकऱ्यांना अनेक अडचणींचा सामना करावा लागत आहे. गुरुवारी (ता. ३) बाजार समितीच्या आवारात आक्रमक झालेल्या शेतकऱ्यांनी अखेर आंदोलनाचा इशारा दिला आहे.