शेतीमाल वाहतूक दरात वाढ होण्याच्या शक्यतेने शेतकरी चिंतेत

पुणे  ः एकीकडे शेतीमालाला बाजारभाव नाहीत त्यातच दरराेज पेट्राेल, डिझेलचे दर वाढत अाहेत. शेतीमधील मशागती, फवारणीसाठी यांत्रिकीकरणाचा वापर वाढला आहे. यासाठी पेट्राेल डिझेलचा वापर वाढत आहे. परिणामी शेतीच्या उत्पादन खर्चात देखील २० टक्क्यांनी वाढ झाल्याने शेतकरी अधिक अडचणीत आल्याचे वास्तव आहे. अद्याप वाहतूकदारांनी शेतीमाल वाहतुकीच्या दरात वाढ केलेली नसून, इंधन दरवाढ बघता भविष्यात ही वाढ हाेणार या शक्यतेने शेतकरी अधिक चिंतेत आहे.

याबाबत बाेलताना बाळकृष्ण वर्पे (रा. धामणखेल, ता. जुन्नर) म्हणाले, की सध्या काेणत्याच शेतमालाला बाजारभाव नाहीत. मी सध्या फुले आणि भाजीपाला दादर आणि वाशी (नवीमुंबई) येथे पाठवत आहे. पेट्राेल डिझेलच्या दरवाढीमुळे वाहतूकदारांनी अद्याप शेतमाल वाहतुकीचे दर वाढविलेले नाहीत. मात्र बैलांची संख्या कमी हाेत चालली असल्याने आमच्या गावात यांत्रिकीकरणाकडे शेतकरी वळत आहे. यामुळे नांगरणी, मशागती, फवारणींसाठीच्या पाठीवरचा पंपांसाठी देखील पेट्राेल लागत आहे. पेट्राेल, डिझेलच्या दरवाढीमुळे शेतकऱ्यांच्या दैनंदिन खर्चात २० टक्क्यांनी वाढ झाली आहे. एकतर शेतमालाला दर नाही आणि इंधन दरवाढीमुळे खर्चात झालेली वाढ ही शेतकऱ्यांची आर्थिक कुंचबणा करणारी आहे.

इंधन दरवाढीबाबत शेतमाल वाहतूकदार कमलाकर विभुते (रा. मालवंडी, ता. बार्शी, जि. साेलापूर) म्हणाले, की मी गेली १० वर्षांपासून टेम्पोतून शेतीमाल नियमितपणे पुणे बाजार समितीमध्ये आणत आहे. गेल्या १५ दिवसांत डिझेल १० रुपयांनी वाढले असून, मला दरराेज ८० लिटर डिझेल लागते. या दरवाढीमुळे माझा दिवसाचा खर्च ८०० ते १ हजार रुपयांनी वाढला आहे. मात्र शेतकऱ्यांकडून लगेच वाहतूक खर्च वाढवता येत नाही. आधीच शेतमालाला दर नसल्याने शेतकरी अडचणीत आहे. त्यात वाहतूक दरवाढ करणे आम्हालाच अवघड झाले आहे. वाढलेले दर कमी नाही झाले तर आम्हाला शेतमाल वाहतुकीचे दर वाढवावे लागतील.