लासलगावात कांदा उत्पादकांना रोख पेमेंट मिळणार

नाशिक : लासलगाव, निफाड येथील बाजार समितीच्या मुख्य बाजार आवारात धान्याप्रमाणेच कांदा उत्पादकांना रोख रक्कम मिळणार आहे. येत्या सोमवारपासून वजनमापानंतर रोख चुकवती करण्याचा तसेच आठवड्याच्या पहिल्या, तिसऱ्या व पाचव्या शनिवारी दुपारपर्यंत कांदा लिलाव सुरू करण्याचा निर्णय व्यापारी वर्गाने मंगळवारी झालेल्या संयुक्त बैठकीत घेण्यात आल्याची माहिती बाजार समितीचे सभापती जयदत्त होळकर यांनी दिली. लासलगाव बाजार समितीच्या या निर्णयाचे शेतकऱ्यांमधून स्वागत होत आहे.

नोटाबंदीनंतर सध्या येथील कांदा विक्री करणाऱ्या शेतकऱ्यांना धनादेश, आरटीजीएस, एनईएफटी सेवेद्वारे चुकतीची रक्कम अदा करण्यात येत आहे; परंतु धनादेशाद्वारे मिळालेल्या शेतमाल विक्रीची रक्कम संबंधित शेतकऱ्यांच्या बॅंक खात्यावर वर्ग होण्यास उशीर होतो. धनादेश, आरटीजीएस, एनईएफटी सेवेद्वारे रक्कम थेट शेतकऱ्यांच्या बॅंक खात्यात वर्ग होत असल्याने बॅंकांच्या सलग सुट्या, तसेच इंटरनेट सेवेचा विस्कळितपणा यामुळे संबंधित शेतकऱ्यांना बॅंकेतून रोख रक्कम काढण्यास अडचणी येतात.

शेतीच्या मशागतीच्या कामासाठी रासायनिक खते, कीटकनाशके, बी-बियाण्यांची खरेदी, मजुरांची मजुरी, वाहनांसाठी इंधन खरेदी आदी दैनंदिन आर्थिक व्यवहार करण्यासाठी त्यांना पैशांची निकड भासत असल्याने लासलगाव बाजार समितीत कांद्याची रोख चुकवती मिळावी, अशी शेतकऱ्यांची मागणी होती. त्या पार्श्‍वभूमीवर मंगळवारी बाजार समितीच्या नवीन कांदा बाजार आवारावर बाजार समितीचे पदाधिकारी व कांदा विभागातील व्यापाऱ्यांची संयुक्त बैठक घेण्यात आली. बैठकीत व्यापाऱ्यांना सोमवार (ता. १८) पासून धान्य शेतमालाप्रमाणेच कांदा विक्री करणाऱ्या शेतकऱ्यांना वजनमापानंतर २४ तासांच्या आत मालविक्रीची संपूर्ण रक्कम रोख स्वरूपात अदा करण्याचा, तसेच दर आठवड्याच्या पहिल्या, तिसऱ्या व पाचव्या शनिवारी सकाळी ९ ते दुपारी १ पर्यंत कांदा लिलाव सुरू करण्याचा निर्णय घेतला.