जत तालुक्यात वादळाने १२५ कोटींचे नुकसान

सांगली  : जत तालुक्यातील रामपूर, मल्लाळ, येळदरी, बागेवाडी, कंठी, वाषाण, बेळुंखी व खलाटी या आठ गावांना वादळी वारे व गारपिटीचा जोरदार तडाखा बसला. त्यामुळे २२४ हेक्टरमधील द्राक्षे, डाळिंब, पपई, मका, ज्वारी, ऊस या पिकांचे आणि पंचवीस घरांचे नुकसान झाले. वादळ व गारपिटीमुळे सुमारे सव्वाशे कोटी रुपयांचे नुकसान झाल्याचा प्राथमिक अंदाज आहे. गुरुवारी सायंकाळी तालुक्यात गारपीट व जोरदार वादळी वारे यांनी अक्षरशः थैमान घातले. दुष्काळाने कंबरडे मोडलेल्या शेतकऱ्यांवर निसर्गाचा पुन्हा कोप झाला. आठ गावांच्या परिसरात सोसाट्याचा वारा व चक्रीवादळाने हाहाःकार माजिवला. अनेक झाडे उन्मळून पडली. पिके जमीनदोस्त झाली.वादळानंतर अचानक गारपिटीस सुरवात झाली. त्यात द्राक्ष, पपई, हळद, मका यांना  सर्वाधिक फटका बसला. रामपूर येथील १२६ हेक्टर मधील द्राक्ष, हळद, मका व पपई या पिकांचे शंभर टक्के नुकसान झाले आहे. उसाचे पन्नास टक्के नुकसान झाले आहे. घाटगेवाडीत खुद्दाबक्ष महेबूब मुल्ला व त्यांच्या भावांच्या वीस एकर द्राक्षबागेचे व दोन एकर मक्याचे मोठे नुकसान झाले आहे. बागेवाडी येथील ३१ हेक्टर क्षेत्रातील द्राक्षबागा व ऊस पिकाचे नुकसान झाले. ६२ शेतकऱ्यांना नैसर्गिक अापत्तीचा फटका बसला. कंठी ३१, बेळुंखी १२, खलाटी ६, वाषाण ११, येळदरी ८  आणि मलाळ येथील २ हेक्टर क्षेत्रातील द्राक्ष, ऊस, मिरची, हळद या पिकांचे नुकसान झाले. द्राक्षबागांचे ९० टक्के नुकसान झाले. बागेवाडी ३ आणि रामपूर येथील ४ घरे, वादळाने पूर्णपणे उद्ध्वस्त झाली आहेत. बागेवाडी ७,  कंठी ५, रामपूर येथील ६ अशा १८ घरांचे वादळामुळे नुकसान झाले आहे. तलाठी, कृषी विभागाचे अधिकारी यांनी नुकसानग्रस्त शेतीचे तातडीने पंचनामे केले आहेत.