डाळिंब उत्पादकांच्या विमा खात्यात १३.६८ कोटी

मालेगाव (सकाळ वृत्तसेवा) : नाशिक जिल्ह्यातील दोन हजार ४८३ शेतकऱ्यांनी २०१७ मधील खरीप हंगामात फळपीक विमा योजनेत सहभाग घेतला होता. यातील दोन हजार ३७६ डाळिंब उत्पादकांना या विम्याचा फायदा मिळाला आहे. त्यांच्या खात्यावर १३ कोटी ६८ लाख रुपये जमा झाले आहेत. अडचणीच्या काळात शेतकऱ्यांना ही मदत मिळणार असून, खरीप हंगामासाठी फायदेशीर ठरेल.

शासनाने जिल्ह्यात मंडलनिहाय हवामान केंद्रे उभारली आहेत. स्कायमेंट कंपनीच्या सहाय्याने ही केंद्रे उभारण्यात आली आहेत. त्यावरील उपलब्ध होणाऱ्या माहितीनुसार शेतकऱ्यांना विमा दिला जातो. २०१७ मध्ये फळपीक विमा योजनेत जिल्ह्यातील दोन हजार ३१४ कर्जदार व १६९ बिगरकर्जदार अशा एकूण दोन हजार ४८३ शेतकऱ्यांनी पीकविमा योजनेत सहभाग नोंदविला. शेतकऱ्यांनी एक कोटी ५७ लाख २९ हजार ३२५ रुपये विम्याचा हप्ता भरला. यातील दोन हजार ३७६ शेतकऱ्यांना पीकविमा योजनेचा लाभ मिळाला. 

शेतकऱ्यांना पीकविम्यापोटी १३ कोटी ६७ लाख ८० हजार १० रुपये मिळाले आहेत. इफको टोकिओ कंपनीने डीबीटी पद्धतीने संबंधित शेतकऱ्यांच्या खात्यावर ही रक्कम जमा केली आहे. तापमानात चढ-उतार, बेमोसमी पाऊस, गारपीट अशा नैसर्गिक आपत्तींत हवामानावर आधारित योजनेचा लाभ मिळतो.