साताऱ्यात १४ हजार क्विंटल सोयाबीनची आवक

सातारा : जिल्ह्यातील शेतकऱ्यांना आधारभूत किंमत मिळावी यासाठी जिल्हा मार्केटिंग विभागाकडून सुरू करण्यात आलेल्या खरेदी केंद्रांना चांगला प्रतिसाद मिळाला आहे. सोयाबीनसाठी सुरू केलेल्या चार केंद्रांवर १४ हजार १७ क्विंटल आवक झाली असल्याची माहिती या विभागाच्या सूत्रांनी दिली आहे.

सोयाबीनच्या दरात घसरण झाल्याने शेतकऱ्यांचे सोयाबीन कमी दरात व्यापाऱ्याकडून मागणी होऊ लागल्याने सोयाबीनला आधारभूत किंमत मिळावी यासाठी प्रथमच जिल्हा मार्केटिंग विभागाकडून सोयाबीन खरेदीसाठी सातारा, कऱ्हाड, कोरेगाव व वाई अशी चार केंद्रे सुरू केली होती. कोरेगाव केंद्रास सर्वाधिक प्रतिसाद मिळाला आहे. या केंद्रावर सात हजार ९६ क्विंटल आवक झाली आहे. तर सातारा केंद्रावर तीन हजार ४७०, वाई केंद्रावर दोन हजार ३४ व कऱ्हाड केंद्रावर १ हजार ४१६ क्विंटल आवक झाली आहे.

जिल्ह्यातील सोयबीनची झालेली लागवड व इतर जिल्ह्याच्या तुलनेत खरेदी केंद्रावर सोयाबीनची आवक कमी दिसत असली तरी पहिलीच वेळ असतानाही प्रतिसाद चांगला मिळाला असल्याचे दिसत आहे. या केंद्रामुळे सोयाबीन खरेदीदार व्यापाऱ्यावर दबाव वाढल्याने दरातही वाढ होण्यास मदत झाली आहे. सध्या खासगी व्यापाऱ्याकडून आधारभूत किमतीच्या दरम्यान दर दिले जात असल्याने खरेदी केंद्रावर सोयाबीनची आवक कमी झाली आहे.

वडूज, दहीवडी व फलटण या तीन केंद्रावर मुगाची २०४ क्विंटल, उदीडाची दोन हजार ५७७, मक्‍याची सात हजार ४८ क्विंटल आवक झाली आहे. मूग व उडदाची नोंदणी खरेदी पूर्ण झाली असून मक्‍याची खरेदी ३१ डिसेंबरअखेर सुरू आहे. नोंदणी झालेली मक्‍याची खरेदी पूर्ण करणार असल्याचे या विभागाकडून सांगण्यात आले आहे.

फलटण येथे तूर पिकांचे खरेदी केंद्र सुरू केले जाणार आहे. केंद्रावर येणाऱ्या तुरीला आधारभूत किंमत ५,४५० रुपये क्विंटला दर दिला जाणार आहे. खरेदी केंद्रावर जानेवारी महिन्याच्या सुरवातीपासून नोंदणी सुरू केली जाणार आहे. - ए. एस. देसाई, जिल्हा मार्केटिंग अधिकारी, सातारा