मराठवाड्यात १५ लाख ३८ हजार जनतेची तहान टॅंकरवर

मराठवाड्यात १५ लाख ३८ हजार जनतेची तहान टॅंकरवर
मराठवाड्यात १५ लाख ३८ हजार जनतेची तहान टॅंकरवर

औरंगाबाद : मराठवाड्यातील उस्मानाबाद वगळता सातही जिल्ह्यांतील ७४९ गाव व १७० वाड्यांमधील १५ लाख ३८ हजार ८३४ लोकांची तहान टॅंकरवर अवलंबून आहे. टॅंकर व थेट पाणीपुरवठ्यासाठी २०९९ विहिरींचे अधिग्रहण करण्यात आले असून, ९३६ टॅंकरने लोकांना पिण्याचे पाणी पुरविले जात आहे.

पावसाळा तोंडावर आला असताना टंचाईग्रस्त गावांची संख्या झपाट्याने वाढत चालली आहे. गत आठवड्यात मराठवाड्यातील ६७३ गाव व १४४ वाड्यांना टंचाईच्या झळा बसत होत्या. या गाव वाड्यांमधील १४ लाख ८० हजार ७७६ लोकांना टंचाईचा सामना करावा लागत होता. आता टंचाईग्रस्त गाव, वाड्यांमध्ये ७६ गावं व २६ वाड्यांची भर पडली आहे. शिवाय गत आठवड्यात टंचाईग्रस्त गाव-वाड्यांना पाणीपुरवठा करण्यासाठी ८७२ टॅंकरची सोय करण्यात आली होती. त्यामध्ये आता पुन्हा ६४ टॅंकरची वाढ करण्यात आली आहे.

पाणीटंचाईचा सामना करणाऱ्या लोकसंख्येतही ५८ हजार ५८ लोकांची भर पडल्याची माहिती सूत्रांनी दिली. औरंगाबाद जिल्ह्यातील सर्वाधिक ५६० गाव, वाड्यांना टंचाईच्या झळा बसत आहेत. त्यापाठोपाठ जालना जिल्ह्यात १२३, परभणीमधील ५०, हिंगोलीतील २३, नांदेडमधील १४४, बीडमधील १६, लातूरमधील ३ गाव, वाड्यांना भीषण टंचाईला सामोरे जावे लागत आहे. उस्मानाबाद जिल्ह्यात मात्र, अजून टंचाईचा सामना करण्यासाठी टॅंकर सुरू करण्याची वेळ आल्याचे चित्र नाही. परंतु उस्मानाबाद जिल्ह्यात टॅंकर व्यतिरिक्‍त पाणीपुरवठ्यासाठी ४१ विहिरींचे अधिग्रहण करण्यात आले आहे.

टॅंकरव्यतिरिक्‍त पाणीपुरवठा करण्यासाठी अधिग्रहित करण्यात आलेल्या विहिरींची संख्या मराठवाड्यातील सातही जिल्ह्यांतील पाणीटंचाईच्या झळांची तीव्रता अधोरेखित करीत आहे. औरंगाबाद जिल्ह्यात २५१, जालना जिल्ह्यात २११, परभणी जिल्ह्यात १८२, हिंगोली जिल्ह्यात २७६, नांदेड जिल्ह्यात ३९४, बीड जिल्ह्यात १३४, लातूर जिल्ह्यात १०४ तर टॅंकरच सुरू करण्याची वेळ न आलेल्या उस्मानाबाद जिल्ह्यात ४१ विहिरींचे अधिग्रहण करण्यात आले आहे. प्रत्यक्षात टॅंकरची संख्या कमी असताना पाणीपुरवठ्यासाठी विहिरींची संख्या मात्र घटत्या भूजल स्तराकडेही लक्ष अधोरेखित करते आहे.

जिल्हानिहाय टॅंकरची संख्या जिल्हानिहाय विहिरी अधिग्रहण
औरंगाबाद.....६०६ औरंगाबाद.....५००
जालना.........१२५ जालना.........३२८
परभणी.........४२ परभणी..........२११
हिंगोली.........२१ हिंगोली.........२९२
नांदेड...........१२४ नांदेड...........४८२
बीड.............१५ बीड.............१३९
लातूर............३ लातूर............१०६

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com