सांगलीत कर्जमाफीचे १६५ कोटी वर्ग

सांगली : छत्रपती शिवाजी महाराज शेतकरी सन्मान योजनेअंतर्गत जिल्ह्यात कर्जमाफी व प्रोत्साहन अनुदानाचे मंगळवारअखेर ६४ हजार १०५ शेतकऱ्यांच्या खात्यावर १६५ कोटी रुपये वर्ग केले आहेत. जिल्हा बॅंकेला दोन दिवसांपूर्वी प्रोत्साहन अनुदानाचे ३६ कोटी रुपये आले आहेत. सुमारे २५ हजार शेतकऱ्यांची कर्जखाती निल झाली असून, ४० हजार शेतकऱ्यांच्या खात्यांवर प्रोत्साहन अनुदान वर्ग झाले आहे.

कर्जमाफी व प्रोत्साहन अनुदानासाठी जिल्ह्यात तीन टप्प्यांत ८९ हजार ७९० पात्र शेतकऱ्यांची ग्रीन लिस्ट जिल्हा बॅंकेच्या लॉग इनवर आली आहे. यामध्ये कर्जमाफीस पात्र दीड लाखापर्यंतचे थकबाकीदार शेतकरी २४ हजार १६० आहेत. त्यांच्या कर्जमाफीची रक्कम ८९.६८ कोटी रुपये आहे.

५९ हजार ८९८ शेतकरी प्रोत्साहन अनुदानास पात्र आहेत. त्यांची रक्कम ९०.९१ कोटी रुपये आहे. ओटीएससाठी (वनटाइम सेटलमेंट) ५ हजार ७३९ शेतकरी पात्र आहेत. त्यांनी दीड लाखावरील रक्कम ३१ मार्च २०१८ पर्यंत भरल्यास ३९.४२ कोटी रुपयांचा लाभ होणार आहे. तीन टप्प्यांतील यादीनुसार कर्जमाफी, प्रोत्साहन अनुदान, ओटीएस लाभाची रक्कम २२० कोटी रुपये आहे.

त्यापैकी जिल्हा बॅंकेला १७७ कोटी ३८ लाख रुपये मिळाले आहेत. त्यापैकी मंगळवारी दुपारी ४ वाजेपर्यंत ६० हजार ६६८ शेतकऱ्यांचे १३८ कोटी रुपये जिल्हा बॅंकेने वर्ग केले आहेत.

जिल्हा बॅंक मुख्यालय व शाखा स्तरावर रात्री उशिरापर्यंत कर्जमाफी, प्रोत्साहन अनुदानाची रक्कम वर्ग करण्याचे काम सुरू होते. जिल्हा उपनिबंधक (सहकारी संस्था) प्रकाश अष्टेकर कर्जमाफी अंमलबजावणीबाबत सतत देखरेख ठेवून आहेत. कर्जमाफी व प्रोत्साहन अनुदानासाठी पात्र-अपात्रचे निकष शासनाने ठरवून दिलेले आहेत. पात्र शेतकऱ्यांनी ऑनलाइन नोंदणी करावी, असे आवाहन शासनाने केले होते.