राज्यात सतरा वर्षांत २६ हजार शेतकरी आत्महत्या

सतरा वर्षांत राज्यात २६ हजार शेतकरी आत्महत्या
सतरा वर्षांत राज्यात २६ हजार शेतकरी आत्महत्या

नागपूर : नापिकी, कर्जबाजारीपणा आणि कर्जवसुलीचा तगादा या कारणांमुळे गेल्या सतरा वर्षांत राज्यात २६ हजार ३३९ शेतकऱ्यांनी आत्महत्या केल्याचे पुढे आले आहे. त्यापैकी १२ हजार ८०५ पात्र प्रकरणात संबंधित कुटुंबीयांना राज्य सरकारने एक लाख रुपयांची मदत दिली. मात्र, १३ हजार ५३४ प्रकरणे अपात्र ठरल्याने त्यांना मदत नाकारल्याची माहिती महसूल, मदत आणि पुनर्वसनमंत्री चंद्रकांत पाटील यांनी दिली आहे.

विधान सभेतील विरोधी पक्षनेते राधाकृष्ण विखे यांच्यासह विधानसभेतील आमदारांनी विचारलेल्या तारांकित प्रश्नाला सरकारने लेखी उत्तर दिले. राज्यात पावसाने ओढ दिल्याने येणारी नापिकी, कर्जबाजारीपणा यामुळे राज्यात आतापर्यंत सुमारे ५० हजार शेतकऱ्यांनी आत्महत्या केल्याचे केंद्रीय कृषी मंत्रालयाने सांगितल्याचे निदर्शनाला आले. राज्यातील आत्महत्याग्रस्त शेतकऱ्याच्या कुटुंबीयांना दिलासा देण्यासाठी आत्महत्याग्रस्त कुटुंबातील एका व्यक्तीला शासकीय नोकरी देण्याचा शासाने निर्णय घेतला आहे का यासोबत आणखी काही प्रश्न आमदारांकडून करण्यात आले होते.

या संदर्भातील लेखी उत्तरात मंत्री पाटील यांनी नापिकी, कर्जबाजारीपणा आणि कर्जवसुलीचा तगादा या कारणांमुळे गेल्या सतरा वर्षांत राज्यात २६ हजार ३३९ शेतकऱ्यांनी आत्महत्या केल्याचे स्पष्ट केले. तसेच १२ हजार ८०५ पात्र प्रकरणात संबंधित कुटुंबीयांना राज्य सरकारने एक लाख रुपयांची मदत दिली आहे. १ जानेवारी ते १५ ऑगस्ट २०१७ अखेर मराठवाड्यात ५८० तसेच बीडमध्ये ११५ शेतकऱ्यांनी आत्महत्या केल्या आहेत.

मराठवाड्यात या वर्षी पावसाळ्याच्या सुरवातीला चांगला पाऊस झाल्याने पिके जोमदार आली. पण जूनच्या शेवटच्या आठवड्यापासून कापूस, सोयाबीन, मका, बाजरी, तूर, मूग, उडीद आदी ५ लाख ७९ हजार हेक्टर क्षेत्रावरील पिके करपून गेली आहेत. तसेच दुबार पेरणी न करता आल्याने शेतकऱ्यांनी नैराश्येतून आत्महत्या केल्याचे निदर्शनाला आले असल्याबाबत विचारणा केलेल्या प्रश्नाला मंत्र्यांनी नाही असे उत्तर दिले आहे. भूतपूर्व दुय्यम सेवा निवड मंडळाच्या कक्षेतील (महाराष्ट्र लोकसेवा आयोगाच्या कक्षेबाहेरील) गट-ब व गट-क पदांच्या भरती प्रक्रियेत जर उमेदवारांनी समान गुण मिळाले तर प्राधान्यक्रमात आत्महत्याग्रस्त शेतकऱ्यांच्या मुलांचा समावेश करण्यास शासनाने मान्यता दिली असल्याचे मंत्री चंद्रकांत पाटील यांनी स्पष्ट केले.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com