साताऱ्यात कर्जमाफीसाठी २३३ कोटी

सातारा : छत्रपती शिवाजी महाराज शेतकरी सन्मान योजनेअंतर्गत सातारा जिल्ह्यातील एक लाख ६९ हजार ४१७ शेतकऱ्यांना कर्जमाफीचा लाभ मिळाला आहे. जिल्ह्याला आजपर्यंत २३३ कोटी ६३ लाख ६ हजार ९२८ रुपये प्राप्त झाले असून, यापैकी १८१ कोटी २९ लाख रुपये प्रत्यक्ष शेतकऱ्यांच्या खात्यांत जमा करण्यात आले आहेत, अशी माहिती जिल्हा उपनिबंधक डॉ. महेश कदम यांनी दिली आहे.

राज्य शासनाने शेतकऱ्यांसाठी या योजनेअंतर्गत थकीत शेतकरी कुटुंबाचे दीड लाख रुपयांपर्यंतचे कर्ज माफ करणे, नियमित परतफेड करणाऱ्या शेतकऱ्यांना २५ हजार रुपयांपर्यंत प्रोत्साहनपर अनुदान देण्याचा निर्णय घेण्यात आला. कर्जाचे पुनर्गठन झालेल्या शेतकऱ्यांना या योजनेत सामावून घेण्यात आले आहे.

जिल्ह्यात आतापर्यंत २३३ कोटी ६३ लाख ६ हजार ९२८ रुपये प्राप्त झाले आहेत. यापैकी २६,२६४ शेतकऱ्यांच्या कर्ज खात्यात ११९ कोटी ४५ लक्ष ४५९१ रुपये रक्कम जमा करण्यात आली असून, ३९,३३८ शेतकऱ्यांच्या बॅंक खात्यात ६१ कोटी ८४ लाख २६ हजार ८७२ रुपये प्रोत्साहनपर लाभाची रक्कम जमा करण्यात आली आहे.

उर्वरित रक्कम जमा करण्याची कार्यवाहीसुद्धा बॅंकांच्या माध्यमातून गतीने सुरू आहे. शेतकरी कर्जमाफीसाठी जिल्ह्यात आतापर्यंत सातारा जिल्हा मध्यवर्ती बॅंकेला १ लाख ५९ हजार ३०८ शेतकऱ्यांच्या कर्जमाफीसाठी २१० कोटी २२ लाख ४७ हजार २७५ आणि राष्ट्रीयीकृत व व्यापारी बॅंकांना ३ हजार ५६५ शेतकऱ्यांच्या कर्जमाफीसाठी २३ कोटी ४० लाख ५९ हजार ६५३ रुपये, असे एकूण २३३ कोटी ६३ लाख ६ हजार ९२८ रुपये प्राप्त झाले आहेत.

यापैकी जिल्हा मध्यवर्ती बॅंकेच्या ६२ हजार ३७ शेतकरी खातेधारकांच्या खात्यांत १५७ कोटी ८८ लाख रुपये, राष्ट्रीयीकृत व व्यापारी बॅंकांच्या ३ हजार ५६५ शेतकऱ्यांच्या खात्यांत २३ कोटी ४० लाख रुपये, अशी एकूण १८१ कोटी २९ लाख ३१ हजार ४६४ रुपये प्रत्यक्ष शेतकऱ्यांच्या खात्यांत रक्कम जमा झाली आहे.

उर्वरित रक्कम शेतकऱ्यांच्या खात्यांत जमा करण्याची कार्यवाही गतीने सुरू आहे. कर्जमाफीसाठी आतापर्यंत एकूण तीन ग्रीन लिस्टनुसार रक्कम प्राप्त झाली आहे. त्यानुसार शेतकऱ्यांच्या खात्यात रक्कम जमा करण्याची कार्यवाही सुरू असल्याचे कदम यांनी सांगितले.