नांदेड : पुणे जिल्ह्यातील कानगाव (ता. दौंड) येथील गावकऱ्यांनी शासनाच्या शेतकरीविरोधी धोरणाच्या निषेधार्थ सुरू केलेल्या बेमुदत संपाला पाठिंबा म्हणून शनिवारी (ता.18) सकाळी नऊ वाजल्यापासून नांदेड जिल्ह्यातील सुमारे २५० गावांमध्ये शेतकऱ्यांनी लाक्षणिक संप केला आहे. सरकारचा जाहीर निषेध करत अनेक ठिकाणी घेण्यात आलेल्या शेतकऱ्यांच्या बैठकांमध्ये सरसकट कर्जमाफी, शेतीमालाला उत्पादन खर्चावर आधारित रास्त भाव, वीजबिल माफी आदी मागण्यांचे ठराव घेण्यात आले. शनिवारी (ता.18) सकाळी बाचोटी (ता. कंधार) येथे राष्ट्रवादी किसान सभेचे प्रदेशाध्यक्ष माजी आमदार शंकरअण्णा धोंडगे यांच्या उपस्थितीत शेतकरी संपास सुरवात झाली. नांदेड जिल्ह्यातील कंधार, मुखेड, लोहा, बिलोली,अर्धापूर नांदेड आदी तालुक्यातील अनेक गावांतील शेतकरी सार्वजनिक ठिकाणी एकत्र आले. यावेळी घेण्यात आलेल्या बैठकांमध्ये सरकारच्या शेतकरी विरोधी धोरणांचा निषेध करण्यात आला. पुणतांबा (जि. नगर) येथील शेतकरी संपाप्रमाणे राज्य सरकारला कानगाव येथील शेतकऱ्यांचा संप मोडीत काढता येऊ नये यासाठी राष्ट्रवादी किसान सभेचे प्रदेशाध्यक्ष माजी आमदार शंकरअण्णा धोंडगे यांच्या पुढाकारातून शेतकरी संघटना, स्वाभिमानी शेतकरी संघटना, काॅंग्रेस, राष्ट्रवादी काॅंग्रेस, संभाजी ब्रिगेड, स्वाभिमानी संभाजी ब्रिगेड, प्रहार जनशक्ती, आम आदमी पार्टी, क्रांतिवीर छावा, किसान बिरादरी आदी पक्ष संघटना या लाक्षणिक संपात सहभागी झाल्या आहेत. दरम्यान, बाचोटी आणि नंदनवन (ता. कंधार) येथील शेतकरी बैठकांमध्ये शेतकऱ्यांना सरसकट कर्जमाफी देण्यात यावी. पीक विमा मंजूर करण्यात यावा. नुकसानग्रस्त शेतकऱ्यांना मदत अनुदान देण्यात यावे आदी मागण्यांचे ठराव संमत करण्यात आले. रविवारी (ता. १९) नांदेड जिल्ह्यातील उर्वरित गावांमध्ये तसेच हिंगोली जिल्ह्यातील गावांमध्ये संप केला जाईल, असे श्री. धोंडगे यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.