सांगली जिल्ह्यात २६२८ शेततळी पूर्ण

सांगली :  जिल्ह्यात मागेल त्याला शेततळे ही योजना जिल्हा कृषी विभागाने चांगली प्रभावीपणे राबिवली आहे. जिल्ह्याला ४ हजार ५०० शेततळ्यांचे उद्दिष्ट होते. त्यापैकी दीड वर्षात २६२८ शेततळे पूर्ण झाले असून, यासाठी ११ कोटी १९ लाख रुपये अनुदान दिले, अशी माहिती कृषी विभागाच्या सूत्रांनी दिली.

शाससाने मागेल त्याला शेततळे ही नवीन योजना तयार केली आहे. यासाठी जिल्ह्यातील शेतकरी प्रतिसाद देत आहेत. जिल्ह्यात ४५०० शेततळ्याचे उद्दिष्ट आहे. त्यापैकी २६२८ शेततळ्याचे उद्दिष्ट पूर्ण झाले आहे.

उर्वरित शेततळ्यांचे उद्दिष्ट मार्चअखेर पूर्ण केले जाणार आहे. दुष्काळी भागातील तासगाव, आटपाडी, कवठेमहांकाळ, जत तालुक्‍यात पाणी प्रश्‍नाला सातत्याने सामोरे जावे लागत असल्याने या भागातील शेतकऱ्यांनी मागेल त्याला शेततळे या योजनेचा लाभ घेतला आहे. सर्वाधिक शेततळे तासगाव तालुक्‍यातील शेतकऱ्यांनी घेतले आहेत. तर कवठेमहांकाळ तालुक्‍यात ५४८ शेततळे आहेत. यामुळे पाण्याचा प्रश्‍न मार्गी लागला आहे.

शिराळा तालुक्‍यात वारणा धरण असल्याने मुबलक पाणी उपलब्ध आहे. यामुळे या तालुक्‍यात केवळ ७६ शेततळी आहेत. या तालुक्‍यात शेततळ्यासाठी असणारा निधी तसाच आहे. या तालुक्‍यात ५ लाख रुपये निधी शेततळ्यासाठी राखून ठेवला आहे. जिल्ह्यात शेततळ्याचा आजमितीत १३ लाख २३ हजार निधी अजून शिल्लक आहे. शेतकरी अजूनही मागेल त्याला शेततळ्यासाठी ऑनलाइन अर्ज करत आहेत. त्यामुळे हा निधी कमी पडू नये यासाठी शासनाकडे निधीचा मागणी केली आहे.

जिल्ह्यात गेल्या आठवड्यात १८१ शेततळे पूर्ण झाली आहेत. या पूर्ण झालेल्या शेततळ्यांची माहिती ऑनलाइन प्रणालीवर भरण्याचे काम सुरू असून, त्यासाठी ७२ लाख ४० हजार रुपयांच्या निधीची मागणी शासनाकडे केली असल्याची माहिती कृषी विभागाच्या सूत्रांनी दिली.

जिल्ह्यात मागेल त्याला शेततळे ही योजना प्रभावीपणे राबविली जाते आहे. शेतकऱ्यांनी या योजनेला लाभ घ्यावा. - राजेंद्र साबळे जिल्हा कृषी अधीक्षक, सांगली.