बुलडाणा जिल्ह्यात केवळ ३० टक्के पीक कर्जवाटप

बुलडाणा ः कमी पावसाने संकटात सापडलेल्या शेतकऱ्यांना बँकांनीही उभे केले नाही. या हंगामात बुलडाणा जिल्ह्यात अवघे  ३०.११ टक्के पीककर्ज वाटप झाले असून, ७० टक्के शेतकरी वंचित राहिले अाहेत. १७४५ कोटींचे उद्दिष्ट असलेल्या या जिल्ह्यात केवळ ५२५ कोटी रुपयांचेच वाटप बँकांनी केले अाहे.

खरिप हंगामासाठी गेल्या वर्षाच्या तुलनेत पीककर्जाची एकूण रक्कम वाढवून सुमारे १७४५ कोटी करण्यात अाली होती. एप्रिलपासून पीककर्ज वाटपाला सुरवात झाल्यानंतर सहा महिन्यांत म्हणजेच ३० सप्टेंबर अखेरचा अाढावा घेतला असता सर्व बँकांमिळून ५२५ कोटींचे पीककर्ज वितरीत झाले. काही बँकांची पीककर्ज वाटपात अत्यंत निराशाजनक कामगिरी अाहे. अलाहाबाद बँकेला १०९७  खातेदारांना पीककर्ज देण्याचे उद्दिष्ट दिलेले असताना केवळ १४ शेतकऱ्यांना या बँकेने पीककर्ज दिले.

अांंध्र बँकेनेही २० जणांना पीककर्ज देत उद्दिष्टाच्या अवघी दोन टक्क्यांपर्यंत धाव घेतली. कॅनरा बँकेने ३२९२ शेतकऱ्यांच्या उद्दिष्टाच्या तुलनेत केवळ १०३ शेतकऱ्यांना पीककर्ज देत केवळ २.३१ टक्के उद्दीष्टपूर्ती केली. पंजाब नॅशनल बँक, देना बँक, युको बँक, या बँकांची कामगिरी पाच टक्केही पीककर्ज वाटपापर्यंत पोचू शकलेली नाही. बँक अाॅफ इंडियाने २३.७६ टक्के, बँक अाॅफ महाराष्ट्रने २७.०१ टक्के, सेंट्रल बँकेने ४०.६५ टक्के, स्टेट बँक अाॅफ इंडियाने ४३.०३ टक्के पीककर्ज वाटप केले अाहे.  

बुलडाणा जिल्हा हा मागील पाच वर्षांपासून सातत्याने दुष्काळाला सामोरा जात अाहे. याही हंगामात कमी पावसामुळे दुष्काळाचे संकट अोढवले अाहे. खरीप मूग, उडीद, सोयाबीन पिकांची उत्पादकता ४० ते ६० टक्क्यांपर्यंत खाली अाहे. परतीचा पाऊसही न झाल्याने रब्बी लागवडीवर विपरित परिणाम होण्याची चिन्हे तयार झाली अाहेत.         

बँकांनी पीककर्ज वाटपाला गती द्यावी यासाठी सातत्याने बैठका झाल्या होत्या. पंरतु तांत्रिक अडचणी पुढे करीत शेतकऱ्यांना पीककर्ज नाकारण्यात अाल्याचेच या वाटपाने शिक्कामोर्तब केले अाहे. खरीपात पीककर्ज न मिळणे, पिकांची उत्पादकता घटण्यासोबतच अाता रब्बी लागवडीवर प्रश्नचिन्ह उभे ठाकले अाहे. एकूणच या जिल्ह्यातील शेतकऱ्यांसमोर दिवसेंदिवस अडचणीत वाढत चालल्या अाहेत.    

पीककर्जवाटपाची स्थिती खातेदार शेतकरी - ३२८६६५ पीककर्ज उद्दीष्ट -१७४५ कर्ज मिळालेले शेतकरी-७४०६५ वाटप कर्जाची रक्कम-५२५कोटी टक्केवारी -३०.११