नव्या हंगामात ऊस गाळपासाठी ३१ साखर कारखान्यांना परवाने

पुणे : राज्यात नव्या गाळप हंगामासाठी आतापर्यंत ३१ साखर कारखान्यांनी परवाने मिळवले आहेत. तसेच विनापरवाना एकाही साखर कारखान्याने गाळप सुरू केले नसल्याचे साखर आयुक्तालयाच्या सूत्रांनी स्पष्ट केले.   राज्यात २०१८-१९ च्या गाळप हंगामासाठी २० ऑक्टोबरपासून परवाने वाटप सुरू करा, असे आदेश मुख्यमंत्र्यांच्या अध्यक्षतेखालील मंत्री समितीने दिले होते. मात्र, ऊस दर नियंत्रण मंडळाच्या शेतकरी सदस्यांनी अलीकडे वार्ताहरांशी बोलताना काही कारखान्यांनी साखर आयुक्तांच्या परवानगीशिवाय सुरू केल्याची तक्रार केली होती.  ‘‘आयुक्तांच्या मान्यतेशिवाय कोणत्याही कारखान्याला गाळप सुरू करता येत नाही. परवाना घेण्यापूर्वीच गाळप सुरू केल्याच्या संशय व्यक्त केला गेला होता. तथापि, प्रादेशिक साखर सहसंचालकांनी स्वतः या कारखान्यांना भेटी दिल्या आहेत. एकाही कारखान्यांने मान्यतेविना गाळप चालू केलेले नाही. तसे अहवालदेखील प्रादेशिक कार्यालयातून प्राप्त झाले आहेत,’’ असे सूत्रांनी स्पष्ट केले.  राज्यात यंदा किमान १०० सहकारी व ९० खासगी साखर कारखाने गाळपासाठी उतरण्याची शक्यता आहे. आतापर्यंत ३१ कारखान्यांनी गाळप परवाने घेतलेले आहेत. तसेच एकूण १९४ कारखान्यांनी प्रादेशिक सहसंचालकांकडे परवान्यासाठी प्रस्ताव दाखल केले होते. छाननीअंती १३८ प्रस्ताव साखर आयुक्तालयाला पाठविण्यात आलेले आहेत. ‘‘कायद्यानुसार शेतकऱ्यांना एफआरपी आणि आरएसएफनुसार पेमेंट न केलेल्या साखर कारखान्यांना परवाने देण्याचा सध्या तरी विचाराधीन नाही. सहसंचालकांच्या स्तरावर अजूनही ५६ कारखान्यांची माहिती तपासली जात आहे,’’ असे आयुक्तालयाचे म्हणणे आहे.  साखर उत्पादन अंदाज पाच लाखांनी घटला राज्यात गेल्या हंगामाच्या तुलनेत १०५ लाख टन साखर तयार होण्याचा अंदाज गेल्या महिन्यात व्यक्त करण्यात आला होता. तथापि, आता  दुष्काळी स्थितीचा आढावा घेता सुधारित अंदाजात यात पाच लाख टनाने घट गृहीत धरण्यात आलेली आहे. गेल्या हंगामात सहकारी व खासगी कारखान्यांना ९.०५ लाख हेक्टरवरील उसाचे गाळप केले. त्यापासून १०७ लाख टन साखर तयार झाली होती. यंदा ९० ते १०० लाख टन साखर तयार होईल, असे सुधारित अंदाजानुसार सांगितले जात आहे.