नाशिक : "अपेडा'च्या ग्रेपनेट प्रणालीनुसार निर्यातक्षम रेसिड्यू फ्री द्राक्षांसाठी कृषी विभागाकडे देशभरातील द्राक्ष उत्पादकांनी 32 हजार 134 प्लॉटची नोंदणी केली आहे. अपेडाच्या संकेतस्थळावर केलेल्या नोंदणीत सर्वाधिक म्हणजे 32हजार 10 प्लॉटची नोंद महाराष्ट्रातून, तर त्यानंतर आंध्र प्रदेशातून 68 व कर्नाटकातून 36 प्लॉटची नोंद झाली आहे.
पाऊस, थंडी तसेच उत्पादनातील घट पाहता यंदा द्राक्ष नोंदणीची गती काहीशी धीमी आहे. मात्र तरीही आपल्याकडील निर्यातक्षम मालाची नोंदणी करणे गरजेचे आहे. त्यामुळे रेसिड्यू फ्री उत्पादनाचे प्रमाणपत्र शेतकऱ्यांना मिळते. नोंदणीनंतर द्राक्षे निर्यात झाली नाही तरी स्थानिक बाजारात या प्रमाणपत्रामुळे आपले उत्पादन रासायनिक अवशेषमुक्त असल्याचे सिद्ध होते. त्यामुळे जास्तीत जास्त द्राक्ष उत्पादकांनी ही नोंदणी करावी. 30 डिसेंबर 2017 ही नोंदणीची अंतिम मुदत आहे. अशी माहिती कृषी आयुक्तालयातील निर्यात विभागाचे अधिकारी गोविंद हांडे यांनी दिली.
महाराष्ट्रात सर्वाधिक नोंद नाशिक जिल्ह्यातून झाली आहे. सोमवार (ता. 18) पर्यंत नाशिक जिल्ह्यातून 28,240 प्लॉटची नोंद झाली असून त्यानंतर सांगलीतून 1847 तर पुणे जिल्ह्यातून 949 प्लॉटची नोंद झाली आहे. नियमित शेतकऱ्यांच्या प्लॉट बरोबरच नव्याने निर्यात करु इच्छिणाऱ्या द्राक्ष उत्पादकांनीही नोंदणी केली आहे. 30 डिसेंबरपर्यंत 50 हजार प्लॉटची नोंदणी होईल, असा कृषी विभागाचा अंदाज आहे.
| जिल्हा | प्लॉट संख्या |
| नाशिक | 28,240 |
| सांगली | 1847 |
| पुणे | 949 |
| सातारा | 404 |
| नगर | 278 |
| उस्मानाबाद | 126 |
| लातूर | 85 |
| सोलापूर | 78 |
| धुळे | 2 |
| बीड | 1 |
(सोमवार, ता. 18 अखेरची)
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.