नांदेड, परभणी, हिंगोलीत ३३५ कोटी पीक कर्जवाटप

नांदेड ः नांदेड, परभणी, हिंगोली जिल्ह्यांत गुरुवार (ता. २८) पर्यंत ६५ हजार २७१ शेतकऱ्यांना ३३५ कोटी ८० लाख २५ हजार रुपये पीक कर्जवाटप करण्यात आले आहे. माफीच्या अपेक्षेने नूतनीकरण करणाऱ्या शेतकऱ्यांची संख्या कमी झाली आहे. त्यात कर्जमाफी मिळालेल्या असंख्य शेतकऱ्यांनाही नवीन पीककर्ज देण्यास विलंब लावला जात आहे.

नांदेड जिल्ह्यात १ हजार ६८३ कोटी ४७ लाख रुपये पीक कर्जवाटपाचे उद्दिष्ट देण्यात आलेले आहे. गुरुवार (ता. २८) पर्यंत राष्ट्रीयीकृत बॅंकांनी ८ हजार ८७१ शेतकऱ्यांना ९८ कोटी ६१ लाख रुपये, महाराष्ट्र ग्रामीण बॅंकेने ५ हजार ६८९ शेतकऱ्यांना ४२ कोटी ६ लाख रुपये, जिल्हा मध्यवर्ती सहकारी बॅंकेने १९ हजार १७८ शेतकऱ्यांना ४५ कोटी १८ लाख रुपये पीककर्ज वाटप केले आहे. परभणी जिल्ह्यात १ हजार ४७० कोटी ४४ लाख रुपये पीककर्ज वाटपाचे उद्दिष्ट आहे.

राष्ट्रीयीकृत बॅंकांनी २ हजार ५०२ शेतकऱ्यांना २२ कोटी ३६ लाख रुपये, खासगी बॅंकांनी ७८६ शेतकऱ्यांना ११ कोटी ३९ लाख रुपये, महाराष्ट्र ग्रामीण बॅंकेने ४ हजार ७६० शेतकऱ्यांना ३९ कोटी ६ लाख रुपये, जिल्हा मध्यवर्ती सहकारी बॅंकेने १३ हजार २४० शेतकऱ्यांना २४ कोटी ४९ लाख रुपये असे एकूण २१ हजार २८८ शेतकऱ्यांना ९७ कोटी ३० लाख रुपये म्हणजेच उद्दिष्टाच्या ६.६२ टक्के वाटप झाले आहे. यंदा १ हजार ७४७ शेतकऱ्यांनी १८ कोटी ७९ लाख रुपयांच्या कर्जाचे नूतनीकरण केले आहे. १९ हजार ५४१ शेतकऱ्यांना ७८ कोटी ५१ लाख रुपये नव्याने पीककर्ज देण्यात आले आहे. हिंगोलीत ९५९ कोटी खरीप पीक कर्जवाटपाचे उद्दिष्ट आहे. व्यापारी बॅंकांनी २ हजार ५४२ शेतकऱ्यांना २६ कोटी ९ लाख ३७ हजार रुपये, महाराष्ट्र ग्रामीण बॅंकेने ४ हजार ४०९ शेतकऱ्यांना ४१ कोटी ५६ लाख ४७ हजार रुपये, जिल्हा बॅंकेने ५ हजार ८३६ शेतकऱ्यांना ११ कोटी ८ लाख ७८ हजार रुपये असे एकूण १० हजार २४५ शेतकऱ्यांना ५२ कोटी ६५ लाख २५ हजार रुपये (४.७० टक्के) पीक कर्जवाटप करण्यात आले. २ हजार ८५७ शेतकऱ्यांना २६ कोटी ८५ लाख ४४ हजार रुपये नवीन पीक कर्जवाटप करण्यात आले तर ७ हजार ३८९ शेतकऱ्यांनी २५ कोटी ८२ लाख रुपये कर्जाचे नूतनीकरण केले.