औरंगाबाद : मराठवाड्यासह खानदेशातील सात जिल्ह्यांतील २१ साखर कारखान्यांनी सोमवारपर्यंत (ता.८) ३७ लाख ६० हजार टन उसाचे गाळप केले. या गाळपातून ३२ लाख ८१ हजार क्‍विंटल साखरेचे उत्पादन झाले असून, सर्व कारखान्यांच्या साखरेचा उतारा सरासरी ८.७३ इतका आहे. सोमवारच्या गाळपात दहा कारखान्यांचा साखर उतारा दहाच्या पुढे आला होता.
खानदेशातील धुळे वगळता नंदुरबार व जळगावमधील पाच साखर कारखान्यांनी यंदा उस गाळपात सहभाग नोंदविला आहे. त्यामध्ये नंदुरबार जिल्ह्यातील तीन व जळगाव जिल्ह्यातील दोन साखर कारखान्यांचा समावेश आहे. नंदुरबार जिल्ह्यातील तीन साखर कारखान्यांनी सोमवारपर्यंत ४ लाख ३८ हजार ६५६ मेट्रिक टन उसाचे गाळप करून ३ लाख ८९ हजार क्‍विंटल साखरेचे उत्पादन केले.
या कारखान्यांचा सरासरी साखर उतारा ८.८८ टक्‍के इतका राहिला. सोमवारी नंदुरबार जिल्ह्यातील आदिवासी सहकारी साखर कारखान्याचा उतारा १०.८२ इतका राहिला. जळगाव जिल्ह्यातील दोन साखर कारखान्यांनी २ लाख २९ हजार ५६० मेट्रिक टन उसाचे गाळप करताना १ लाख ८७ हजार क्‍विंटल साखरेचे उत्पादन केले. दोन्ही साखर कारखान्यांचा सरासरी साखर उतारा ८.१८ टक्‍के इतका राहिला. सोमवारी संत मुक्‍ताबाई शुगर अँड एनर्जीचा साखर उतारा १०.८३ टक्‍के इतका राहिला.
औरंगाबाद जिल्ह्यातील चार साखर कारखान्यांनी सोमवारपर्यंत ६ लाख ५२ हजार टन उसाचे गाळप करत ५ लाख ६५ हजार १२५ क्‍विंटल साखरेचे उत्पादन केले. चारही कारखान्यांचा सरासरी साखर उतारा ८.६६ टक्‍के इतका राहिला, तर सोमवारी मुक्‍तेश्वर शुगर्सचा साखर उतारा १०.२८ टक्‍के राहिला.
जालना जिल्ह्यातील पाच साखर कारखाने यंदा गाळपासाठी उतरले आहेत. या पाचही साखर कारखान्यांनी सोमवारपर्यंत ९ लाख १८ हजार ५१६ मेट्रिक टन उसाचे गाळप करून ८ लाख ८ हजार ८२५ क्‍विंटल साखरेचे उत्पादन केले. पाचही कारखान्यांचा सरासरी साखर उतारा ८.८१ टक्‍के राहिला. सोमवारी पाचपैकी चार कारखान्यांचा साखर उतारा ११ टक्‍क्‍यांच्याही पुढे राहिला.
बीड जिल्ह्यातील सात साखर कारखान्यांकडून उसाचे गाळप सुरू आहे. त्यामध्ये पाच सहकारी तर दोन खासगी साखर कारखान्यांचा समावेश आहे. सोमवारपर्यंत सातही कारखान्यांनी १५ लाख २० हजार टन उसाचे गाळप करत १३ लाख ३० हजार १९० क्‍विंटल साखरेचे उत्पादन घेतले.
सातही कारखान्यांचा सरासरी साखर उतारा ८.७५ टक्‍के इतका राहिला असून सोमवारी सातही साखर कारखान्यांचा सरासरी उतारा १०.४९ टक्‍के इतका राहिला होता. जय महेश एनएसएल व येडेश्वर शुगर या दोन साखर कारखान्यांचा साखर उतारा १० टक्क्‍यांपुढे होता, अशी माहिती प्रादेशिक साखर सहसंचालक कार्यालयाच्या वतीने देण्यात आली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.