नगर जिल्ह्यात चांगल्या पावसाची ४२ मंडळात नोंद

नगर ः नगर जिल्ह्यामधील बहुतांश भागात शनिवारी (ता. २३) पावसाने हजेरी लावली. आत्तापर्यंत नगर जिल्ह्यामधील सुमारे ४२ महसूल मंडळांत शंभर मिलिमीटर पेक्षा जास्ती पाऊस झाला आहे. जिल्ह्याची पावसाची ४९७ मिलिमीटरची सरासरी असून दोन तालुके चाळीस टक्‍क्‍यांच्या पुढे गेले असल्याची प्रशासनाची नोंद आहे. सर्वात कमी पाऊस वडेगव्हाण (ता. पारनेर) महसूल मंडळात झाला आहे.

नगर जिल्ह्याच्या सर्वच भागांत पावसाळा सुरू झाल्यानंतर पंधरा दिवसाने पावसाला सुरवात झाली. गेल्या चार दिवसांपासून सातत्याने चांगला पाऊस पडत आहे. त्यामुळे पेरण्या, कापूस लागवडीला सुरवात होत आहे. यंदा खरिपात मूग, उडिदाची जास्ती पेरणी होण्याचा अंदाज होता, मात्र पाऊस लांबल्यामुळे आता उडीद, मूगाचे क्षेत्र कमी होण्याचा अंदाज असून कांद्याची लागवड वाढणार असल्याचे सांगितले जात आहे. जिल्ह्यामध्ये आत्तापर्यंत सरासरीच्या तुलनेत २७.१८ टक्के पाऊस झाला आहे.

गेल्यावर्षी आतापर्यंत ३३.४५ टक्के पावसाची नोंद झाली होती. जिल्ह्यामध्ये असलेल्या ९७ महसूल मंडळापैकी ४२ महसूल मंडळात शंभर मिलिमीटरपेक्षा जास्ती पाऊस झालेला असून जामखेड, खर्डा, जेऊर (ता. नगर) संगमनेर, डोळासणे (ता. संगमनेर), पोहेगाव, सुरेगाव (ता. कोपरगाव) या सात महसूल मंडळात दोनशे मिलिमीटरपेक्षा जास्ती पाऊस झाला आहे. शनिवारी सर्वाधिक जेऊर (ता. नगर) महसूल मंडळात सर्वाधिक १०५ मिलिमीटर पावसाची नोंद झाली. जेऊर भागात त्यामुळे काही घरात पाणी शिरले होते. दरवर्षीच्या तुलनेत मात्र अकोले तालुक्‍याच्या आदिवासी भागात पाऊस कमी आहे.