शॉर्टसर्किटने ४५ एकरांतील ऊस जळाला

भवानीनगर, जि. पुणे  ः विजेच्या शॉर्टसर्किटमुळे शुक्रवारी (ता. ३) सकाळी अकराच्या लागलेल्या आगीत काझड व सणसर भागातील अनेक शेतकऱ्यांचे जवळपास ४० ते ४५ एकर उसाचे पीक जळाले. जवळपास एक किलोमीटर अंतरात लागलेल्या या आगीत शेतकऱ्यांचे लाखोंचे नुकसान झाले. अग्निशमन दलाच्या वाहनांना रस्तेच न मिळाल्याने तब्बल चार तास भडकलेली आग उसाचे नुकसान करून थांबली. या आगीने व्होरा वस्तीवरील उसाच्या पिकांना वेढा घातला आणि पाहता पाहता आगीने रौद्र स्वरूप धारण केले. आगीच्या ज्वाळा एवढ्या मोठ्या होत्या की, अर्ध्या ते एक किलोमीटर अंतरावरून ही आग दिसत होती. प्रकाश निंबाळकर, प्रताप निंबाळकर, संतोष देवडे, चकोर व्होरा, शांतिलाल व्होरा या शेतकऱ्यांसह आजूबाजूच्या शेतकऱ्यांच्या पिकांनाही आगीने वेढले व काही वेळातच एक-एक एकर भस्मसात करीत आग पुढे सरकत गेली. काझडच्या हद्दीतून पुढे सरकलेली आग नीरा डाव्या कालव्याच्या कडेपर्यंत येऊन ठेपली. केवळ नीरा डावा कालवा मध्ये आडवा असल्यानेच आग पुढे सरकली नाही असे येथील शेतकरी सांगत होते.

दरम्यान, ही आग लागताच काही शेतकऱ्यांनी छत्रपती कारखान्याच्या अग्निशमन दलाला कळविले. त्यानंतर कारखान्याने अग्निशमन दलाची वाहने तेथे पाठविली, मात्र वाहनांना जाण्याइतपत रस्ता नसल्याने अग्निशमन दलाच्या गाड्या मध्येच अडकल्या. अखेर शेतकऱ्यांनी स्वतःच एकमेकांची मदत घेत आगीपासून काही अंतरावरील पिकांमधील पालापाचोळा दूर सारत, उसाची पिके एका बाजूला सारत आगीची धग कमी करण्याचा प्रयत्न केला. अर्थात तोपर्यंत बऱ्यापैकी उसाची पिके आगीने कवेत घेतली होती.