गुजरातमध्ये भुईमुगास 50 रुपये बोनस

नवी दिल्ली ः गुजरातमध्ये यंदा भुईमूगाच्या उत्पादनात वाढीचा अंदाज व्यक्त करण्यात आला आहे. यामुळे आवक वाढून किमती घसरू नये व शेतकऱ्यांना रास्त दर मिळावेत यासाठी राज्य सरकारने सोमवारी (ता. 25) भुईमूगाला क्विंटलमागे 50 रुपये बोनस देण्याचा निर्णय घेतला आहे, अशी माहिती सूत्रांनी दिली आहे.

केंद्राने खरीप हंगामासाठी भुईमूगाला क्विंटलमागे 4250 रुपये किमान आधारभूत दर (एमएसपी) आणि 200 रुपये बोनस जाहीर केलेला आहे. मात्र येथील अनेक प्रमुख बाजारपेठांमध्ये भुईमूगाची 3175 ते 3300 रुपये प्रति क्विंटल या दराने खरेदी होत आहे. यामुळे शेतकरी आर्थिक संकटात सापडले आहेत. याविरोधात शेतकऱ्यांसह अनेक वेळा शेतकरी संघटना तसेच राजकीय पक्षांनीही आंदोलन करून विरोध दर्सविला आहे.

यंदा अनुकूल हवामान परिस्थितीमुळे येथील भुईमूगाचे उत्पादन गेल्या वर्षीपेक्षा 19 टक्‍क्‍यांनी वाढून 32 लाख टनांपर्यंत राहण्याचा अंदाज कृषी विभागाने वर्तविला आहे. या परिस्थितीत भुईमुगाची आवक वाढून दर कमी होण्याची शक्‍यता आहे. तसेच सरकारविरोधात जनमत तयार होऊ नये यासाठी राज्य सरकारने क्विंटलमागे 50 रुपये बोनस देण्याचा निर्णय घेतला असल्याची माहिती सूत्रांनी दिली आहे.

राज्य सरकारमार्फत भुईुमूगाची 106 केंद्रांवर शासकीय खरेदी करण्यात येणार आहे. बाजार समित्यांमध्ये जेव्हा भुईमूगाची आवक वाढते अशा वेळी म्हणजे 25 आक्‍टोबरपासून ही केंद्रे खरेदीला प्रारंभ करणार आहेत. शेतकऱ्यांनी यासाठी ऑनलाइन नोंदणी करावी, असे आवाहन सरकारने केले असून खरेदीचा दिवस आणि वेळ याचा संबंधित शेतकऱ्यांना एसएमएस पाठविला जाणार आहे.

(स्रोतः कृषी संचालनालय गुजरात, एसईए)