साखर निर्यातीस ५०० रुपये अनुदान द्यावे : हर्षवर्धन पाटील

नीरा नरसिंहपूर, जि. पुणे ः ‘‘साखरेच्या दर घसरणीमुळे साखर कारखान-दारीसमोर मोठ्या अडचणी उभारल्या आहेत. केंद्र व राज्य सरकारने पन्नास लाख टन साखर निर्यातीस परवानगी देऊन प्रतिटन ५०० रुपयांचे अनुदान द्यावे. त्या संदर्भात पुण्यात २९ डिसेंबरला कारखानदारांची बैठक बोलाविण्यात आली आहे,’’ अशी माहिती माजी सहकारमंत्री हर्षवर्धन पाटील यांनी दिली.

गणेशवाडी (ता. इंदापूर) येथे कार्यकर्त्यांच्या भेटीवेळी पाटील पत्रकारांशी बोलत होते. या वेळी उदयसिंह पाटील, अमर पाटील, मनोज पाटील, विकास पाटील, अंकुश घाडगे, चाँद सय्यद, तुकाराम घोगरे आदी उपस्थित होते.

पाटील म्हणाले, ‘‘राज्यात चालू गाळप हंगामातील दोन महिन्यांचा कालावधी संपत आला आहे. पण, कारखानदारी पुढील संकटाची मालिका संपण्याचे नाव घेत नाही. राज्यातील सर्वच कारखान्यांनी २२०० ते ३००० रुपयांपर्यंत पहिली उचल जाहीर केली आहे; परंतु बाजारपेठेत साखरेच्या दराची घसरण सुरू आहे. आज साखरेचे दर ३००० रुपयांवर आल्याने कारखानदारीपुढे मोठे संकट उभा ठाकले आहे.

‘यूपीए’ सरकारच्या काळात २००७ आणि २०१० मध्ये कारखान्यांना ‘बफर स्टॉक’ करण्याची परवानगी होती. आताही सरकारने ‘बफर स्टॉक’ची परवानगी द्यावी, असेही  हर्षवर्धन पाटील म्हणाले.