जळगाव जिल्ह्यात ५२ हजार क्विंटल हरभऱ्याची खरेदी अपूर्ण

जळगाव : जिल्ह्यात शासकीय हरभरा खरेदीचा वेग सुरवातीपासून बरा असला तरी अद्याप नोंदणी केलेल्या शेतकऱ्यांचा सुमारे ५२ हजार क्विंटल हरभरा खरेदी झालेला नाही. त्यामुळे पुढे हरभरा खरेदीस मुदतवाढ मिळण्याची मागणी केली जात आहे.  जिल्हाभरात आत्तापर्यंत ६६ हजार क्विंटल हरभरा खरेदी १२ शासकीय खरेदी केंद्रांमध्ये पूर्ण झाली आहे. ही खरेदी मध्यंतरी बारदान व इतर अडचणींमुळे रखडत सुरू होती. परंतु या महिन्याच्या मध्यापासून खरेदी वेगात सुरू झाली. जिल्ह्यात पारोळा, अमळनेर येथील हरभरा खरेदी केंद्र मध्यंतरी काही कारणांनी बंद होते. तसेच रावेर व जामनेरच्या केंद्रातही अडचणी आल्या होत्या. तर जळगाव येथील केंद्रातही शेतकऱ्यांच्या रांगा लागल्या होत्या. खरेदी ठप्प झाल्याने शेतकऱ्यांनी शेतकी संघाच्या संचालकांकडे तक्रारी केल्या होत्या. या सगळ्या स्थितीत आता मंगळवारी (ता. २९) खरेदी बंद होणार आहे. ज्या शेतकऱ्यांनी शासकीय खरेदी केंद्रात हरभरा विक्रीबाबत नोंदणी केली आहे, त्यांचा सुमारे ५२ हजार क्विंटल हरभरा पडून राहील, असे निश्‍चित आहे. त्यामुळे हरभरा खरेदीला शासनाने तातडीने मुदतवाढ द्यायला हवी. कारण पुढे खरीप हंगाम उभा करायचा असून, बॅंकांनी कर्ज वितरण सुरू केलेले नसल्याने अडचणी वाढल्याचे शेतकऱ्यांचे म्हणणे आहे. हरभरा खरेदीसाठी पारोळा, अमळनेर, जळगाव, यावल, चोपडा, रावेर, मुक्ताईनगर, बोदवड, जामनेर, पाचोरा, चाळीसगाव, भडगाव येथे खरेदी केंद्र सुरू केले होते.  गोदामांची अडचण सध्या हरभरा साठवणुकीसाठी मार्केटिंग फेडरेशनला गोदामांची अडचणही येत आहे. पाच गोदामे जिल्ह्यात वखार महामंडळाने उपलब्ध करून दिली होती. ती पूर्ण भरली आहेत. अलीकडेच जळगाव शहरात आणखी एक गोदाम उपलब्ध करून देण्याची प्रक्रिया प्रशासन राबवित आहे, अशी माहिती मिळाली.  जिल्ह्यात हरभरा खरेदी अपेक्षित गतीने केली. मध्यंतरी गोदामांची अडचण आली. जळगावात एक गोदाम उपलब्ध होणार आहे. शासनाने मुदतवाढ दिली तर हरभरा खरेदी पुन्हा सुरू होईल. मंगळवारी (ता. २९) खरेदी सायंकाळी बंद होईल.  - परिमल साळुंखे, पणन अधिकारी, मार्केटगिं फेडरेशन