सातबारावरील कालबाह्य नोंदीतून करून घ्या सुटका- प्रांताधिकारी

देऊर, जि. धुळे : स्वातंत्र्यानंतरही सात-बारावरील इतर हक्कांत असलेले तगाई कर्ज, बंडिंग बोजे, बेकायदेशीर व्यवहार, झाडांच्या नोंदी, नजरगहाण, विहिरी, कुळे आदी शासनाने सूचना देऊनही तशाच राहिल्या आहेत. या कालबाह्य नोंदी कमी करण्यासाठी मोहीम सुरू करण्यात आली आहे. येत्या ३१ जुलैपर्यंत ही मोहीम सुरू राहणार असल्याची माहिती प्रांताधिकारी गणेश मिसाळ यांनी दिली. शेतकऱ्यांनी यात उत्स्फूर्तपणे सहभागी व्हावे, असे आवाहनही त्यांनी केले आहे.  

जुनाट नोंदीमुळे शेतकऱ्यांची मोठी अडचण होते. या अनावश्‍यक नोंदीतील तगाई कर्ज, बंडिंग बोजे, बेकायदेशीर व्यवहार, झाडांच्या नोंदी, नजरगहाण या नोंदी कमी करण्यात येणार आहेत. शेतकऱ्यांनी या सर्व नोंदी कमी करण्यासाठी तलाठ्याकडे अर्ज द्यावा व प्रक्रिया पूर्ण करून घ्यावी. बोजे कमी झाल्याचे निर्बोज सात-बारा उताऱ्याचे वाटप केले जाणार आहे. 

तगाई ः शेतजमीन सुधारण्यासाठी विहीर तगाई, बैलतगाई, चारा तगाई, ऑइल इंजिन तगाई, घर बांधणे तगाई, जळीत तगाई बी-बियाणे तगाई (सावकारी कर्ज), खावटी तगाईचा समावेश आहे. 

बंडिंग बोजे ः शेतीला बांध घालणे, सपाटीकरण करणे यासाठी मृद्‌संधारण विभागाने बांध घालण्याचा खर्च शेतकऱ्याकडून वसुलीसाठी बोजा टाकला आहे.  बेकायदेशीर व्यवहार : तुकडेबंदी व तुकडेजोड कायदा १९४७ नुसार गावी गटस्कीमची अंमलबजावणी सुरू असताना खरेदी, विक्री व्यवहार बेकायदेशीर ठरविले होते. १९६१ ते ७० कालावधीत या सात-बारावर नोंदी आहेत. 

झाडाच्या नोंदी ः सद्य:स्थितीत कुसुंबा गावात आंब्यांची झाडे नाहीत. आमराई नामशेष झाली आहे. मात्र इतर हक्‍कात झाडांचे प्रकार व हिस्सा राशी संबंधीच्या नोंदणी आजही कायम आहेत. 

तलाठी व मंडलाधिकारी मोहीम स्वरूपात पुढील दोन महिन्यांत सातबारा उताऱ्याच्या इतर हक्कांत असलेले अनावश्‍यक शेरे-नोंदी कमी करण्याची कार्यवाही करणार आहेत. शेतकऱ्यांनी संबंधित तलाठ्याकडे करावा.  - गणेश मिसाळ, प्रांताधिकारी, धुळे