सोयाबीन अनुदानापोटी ८२ कोटी रुपये शेतकऱ्यांच्या खात्यांत वर्ग

पुणे ः साेयाबीनच्या काेसळलेल्या दरामुळे शेतकऱ्यांना प्रतिक्विंटल २०० रुपये अनुदान देण्याचा निर्णय राज्य सरकारने घेतला होता. या निर्णयामुळे राज्यातील २ लाख ६९ हजार ८२४ शेतकऱ्यांना ८२ कोटी ५७ लाख रुपयांचे वाटप केल्याची माहिती पणन संचालक डॉ. आनंद जोगदंड यांनी दिली. सर्वाधिक लातूर जिल्ह्यात १७ काेटी रुपये अनुदान वाटण्यात आले आहे. गेल्या वर्षीच्या (२०१६-१७) खरीप हंगामात साेयाबीनच्या क्षेत्रात माेठी वाढ झाली हाेती. बाजारातील आवक वाढल्याने दरात माेठी घसरण झाली होती. यामुळे शेतकऱ्यांची आर्थिक नुकसान हाेऊ नये म्हणून २५ क्विंटलपर्यंत आणि जास्तीत जास्त ५ हजार रुपये नुकसानभरपाई देण्याचा निर्णय राज्य सरकारने ऑक्‍टोबरमध्ये घेतला होता. या निर्णयानुसार ऑक्‍टोबर ते डिसेंबर २०१६ या कालावधीत बाजार समितीमध्ये सोयाबीनची विक्री करणाऱ्या शेतकऱ्यांना हे अनुदान देण्यात येणार आहे. यासाठी सरकारने १०८ कोटी ६४ लाख २९ हजार रुपयांचा निधी उपलब्ध करून दिला होता. त्यापैकी ८२ कोटी ५७ लाख रुपये शेतकऱ्यांच्या खात्यांवर जमा करण्यात आल्याचे डॉ. जोगदंड यांनी सांगितले.  दरम्यान, राज्यात सोयाबीन खरेदीची सर्वाधिक १५९ केंद्रे होती, उडदासाठी ११६, तर मूग खरेदीसाठी १११ केंद्रे सुरू केली होती. या केंद्रांवर उडदाची २ लाख ५३ हजार क्विंटल, मुगाची ४१ हजार क्विंटल आणि सोयाबीनची २ लाख २३ हजार क्विंटल खरेदी झाल्याची माहिती डॉ. जोगदंड यांनी दिली. जिल्हानिहाय देण्यात आलेली भरपाई (रुपयांमध्ये) पुणे ः ८.१३ लाख, सोलापूर ः २.६९ लाख, सांगली ः ५ लाख, नाशिक ः ८.६७ लाख, नगर ः ९१.९८ लाख, जळगाव ः ६ लाख, नंदुरबार ः १९.८९  लाख, औरंगाबाद ः ३.९२  लाख, जालना ः ३.५३  कोटी, परभणी ः ४.३१ कोटी, हिंगोली ः १ कोटी, लातूर ः १७ कोटी, बीड ः ६७ लाख, उस्मानाबाद ः ४९ लाख, नांदेड ः २.८४ कोटी, अमरावती ः १२.१५ कोटी, अकोला ः ७ कोटी, वाशीम ः १२ कोटी, बुलडाणा ः ८ कोटी, यवतमाळ ः ४ कोटी, नागपूर ः १.२५ कोटी, वर्धा ः ४.५४ कोटी, चंद्रपूर ः ६८ लाख, धुळे ः ६ लाख, भंडारा ः १५ हजार